Dla turystaŭ, jakija zachraśli ŭ kijeŭskich aeraportach z-za admieny samalotaŭ, arhanizujucca humanitarnyja rejsy, paviedamlaje ŭkrainskaje infarmahienctva UNIAN. Dastaŭkaj kala 850 pasažyraŭ zojmiecca za svoj košt Bravo Airways, adna z avijakampanij, čyje rejsy byli admienienyja.
Nahadajem, MZS Biełarusi viečaram 1 lipienia paviedamiŭ pra ciažkaści z vyletam biełaruskich turystaŭ z Kijeva dźviuma avijakampanijami.
Fota facebook.com/airportkiev.
Surjoznyja składanaści ŭźnikli z vyletam biełaruskich turystaŭ z Kijeva rejsami avijakampanii BravoAirways i AndaAir, papiaredžvaje MZS. Pavodle źviestak MZS, admienienyja rejsy z Kijeva ŭ Alikante, Lublin, Tunis, Tyranu, Šarm-el-Šejch. Zatrymanyja vylety ŭ Antaliju i Batumi, paviedamlaje tut.by.
Viedamstva rekamienduje biełarusam pierad vyletam źviazacca sa svaimi turapieratarami.
Raniej ministr infrastruktury Ukrainy Uładzimir Jemialjan, kamientujučy toje, što hrupa ŭkrainskich turystaŭ nie moža viarnucca dadomu z Tunisu, rastłumačyŭ, što prablemy z rejsami avijakampanii Bravo Airways źviazanyja z machlarstvam turapieratara «Aazis», jaki nie raźličyŭsia z kampanijaj za avijapieraloty. Zapazyčanaść składaje 1 miljon dalaraŭ.
Pavodle ŭkrainskich ŚMI, niekalki tysiač turystaŭ zatrymalisia ŭ aeraporcie «Kijeŭ» (Žulany). U hetym aeraporcie zatrymlivajuć i admianiajuć rejsy, paviedamlaje RBK-Ukraina sa spasyłkaj na pradstaŭnikoŭ aeraporta.
Aeraport «Žulany». Fota RBK-Ukraina.
«Absalutna ŭsie čartarnyja avijarejsy siońnia zatrymlivalisia. Ličačy z 00.00 1 lipienia da 19.00. Zatrymanyja byli ŭsiaho 16 avijarejsaŭ. Ź ich tolki častku rejsaŭ była ažyćcioŭlena», - raspaviali tam. Niekatoryja rejsy zatrymlivajucca ŭžo druhija sutki. «Rejs ŭ Miłan italjanskaj avijakampanii pavinien byŭ vylecieć u 19.00 30 červienia. Ale jaho pieranieśli na 21.00 1 lipienia. Rehistracyju na hety rejs čakajuć kala 19.00», - paviedamili ŭ daviedcy.
Čatyry rejsy z «Žulan» u Tyranu, Alikante, Lublin i Bodrum siońnia admianili. Pasažyram piśmova paviedamili pra zatrymku rejsaŭ pa techničnych pryčynach. «My trapili ŭ zatrymku rejsaŭ pačynajučy ź sierady, i jana budzie doŭžycca da hetaha paniadziełka. Pasažyram z kvitkami i zatrymkami rejsaŭ treba źviartacca ŭ centralny ofis kampanii. Kali pryčyna zatrymki rejsa pa vinie avijakampanii, to stračany dzień kampiensuje avijakampanija», - paviedamili ŭ Bravo. Kampanija patłumačyła, što ad 27 červienia z-za turapieratara admienienyja ŭsie rejsy ŭ Tunis.
Nahadajem, 29 červienia biełaruskija turysty amal sutki praviali ŭ aeraporcie «Baryspal». Rejs na Churhadu avijakampanii Bravo byŭ zatrymany na 10 hadzin, a kali ŭsio ž vylecieŭ, praz paŭhadziny kamandzir sudna paviedamiŭ ab viartańni ŭ aeraport vyletu. Samalot abiacali paramantavać za hadzinu, ale pasažyry stali aburacca i patrabavać zamianić bort. Vyklikali palicyju i napisali kalektyŭnuju admovu ad palotu z-za niaspraŭnaści samalota. U avijakampanii Bravo Airways, jakaja vykonvała rejs, zajavili, što pryčynaj viartańnia samalota stała techničnaja niaspraŭnaść i zamiena ekipaža, bo jon užo vypracavaŭ svaju normu hadzin. U vyniku paśla hadziny nočy sudna ŭsio ž padniałosia ŭ pavietra, adnak palacieli nie ŭsie.
