Zatrymanych «ludźmi ŭ cyvilnym» kala 9:45 Źmitra Daškieviča i Jahora Łaŭruchina, jakija vieźli novyja kryžy ŭ memaryjalny kompleks Kurapaty, vyzvalili kala 13:35 ź Leninskaha RUUS Miensku biez składańnia pratakołu — nieŭzabavie paśla vyzvaleńnia kiroŭcy Valera Minca, piša «Radyjo Svaboda».
Novyja šaścimetrovyja kryžy, jakija chacieli pastavić u narodnym memaryjale, kanfiskavali. Valer Miniec raniej raskazvaŭ, što milicyjanty «pytali niejkija dakumenty, nibyta heta pradmiet handlu, a nie memaryjalnyja kryžy».
Źmicier Daškievič raskazaŭ Svabodzie, što razbor pravodzicca pavodle artykułu ab «parušeńni praviłaŭ handlu i akazańnia pasłuh nasielnictvu» (art. 12.17 KaAP).
Na Daškieviča i inšych zatrymanych nia skłali pratakołaŭ, nie dali nijakich kopijaŭ dakumentaŭ (tolki pratakoł ahladu mašyny Mincu). Pavodle Daškieviča, nieviadoma navat, chto budzie zajmacca spravaj i kamu nieści dakumenty pa kryžach. Pravierka ŭ spravie moža ciahnucca da 10 dzion z mahčymym padaŭžeńniem da 30 dzion.
«Heta naohuł idyjatyzm, niemahčyma vytłumačyć! — aburajecca Daškievič. — Supracoŭnik ABEP, jaki braŭ u mianie pakazańni, kazaŭ, što indyvidualny pradprymalnik, kali niešta viazie, pavinien na ŭsio mieć dakumenty. Zapytvaju, ci čałaviek, jaki zarehistravany pradprymalnikam, pierastaje być fizyčnaj asobaj i na ŭsio musić mieć dazvoł? Kažuć, tak.
Nia viedaju, jakim čynam jany heta apraŭdajuć, bo artykuł zaviecca «parušeńnie praviłaŭ handlu», a kryžami, naturalna, nichto nie źbiraŭsia handlavać, u ich nia moža być pakupnika, vyrablenyja jany nami za ŭłasnyja hrošy i na achviaravańni ludziej. Zaklikali da sumleńnia, kab kryžy viarnuli, ale skazali, što, pavodle artykułu, kryžy padlahajuć kanfiskacyi. Kali nam vydaduć dakument, što kryžy kanfiskujucca dla źniščeńnia, to navat dla Biełarusi heta budzie niejkaja novaja viacha jurysprudencyi».
ABEP pryjechaŭ u cech kampanii «Cieślary», dzie vyrablalisia kryžy. Pradstaŭnik ABEP śćviardžaje, što «viadziecca administracyjny praces», ale padrabiaznaściej nie raskryvaje i dakumentaŭ ab spravie nie vydaje, sprabuje zabaranić videazdymki. Hałoŭny inžyner kampanii-ŭładalnika pamiaškańniaŭ, jakija zdymajuć «Cieślary», tłumačyć supracoŭniku ABEP, što toj znachodzicca na terytoryi pradpryjemstva niezakonna.
