Mitynh u padtrymku kandydata ŭ prezidenty ad Narodna-respublikanskaj partyi Mucharema Indže ŭ Stambule. Fota EPA-EFE/SEDAT SUNA
Kandydat na prezidenckich vybarach ad asnoŭnaj apazicyjnaj Narodna-respublikanskaj partyi Mucharem Indže vystupiŭ u subotu ŭ Stambule na šmatmiljonnym mitynhu. Pra heta paviedamlaje hazieta Cumhuriyet.
Ahitacyjny mitynh u miežach prezidenckaj honki prajšoŭ u stambulskim rajonie Maltepie. «Na mitynhach u Iźmiry i Ankary vas było šmat, ale ŭ Stambule vas sabrałasia 5 miljonaŭ čałaviek», — padkreśliŭ jon.
U svajoj pramovie Indže paabiacaŭ prychilnikam, što ŭ vypadku jaho pieramohi na vybarach Turcyja stanie inšaj krainaj. «Zaŭtra pryjdzie kaniec dyskryminacyi, zaŭtra pryjdzie kaniec biessensoŭnym tratam dziaržaŭnych srodkaŭ. Za apošnija piać dzion my praviali 107 mitynhaŭ, i ja ŭdziačny vam za vašu padtrymku», — zajaviŭ jon.
Fota svoboda.org
Pa dadzienych haziety Sabah, Indže taksama paabiacaŭ adnavić razarvanyja ŭ 2012 hodzie dypłamatyčnyja adnosiny ź Siryjaj u vypadku pieramohi na prezidenckich vybarach. «U pieršyja sto dzion svajho kiravańnia ja nakiruju ambasadara ŭ Siryju, a 4 miljony siryjcaŭ viernucca da siabie dadomu», — zajaviŭ Indže.
Jon taksama paabiacaŭ u vypadku pieramohi na vybarach u pieršy ž dzień admianić režym nadzvyčajnaha stanovišča, jaki byŭ uviedzieny ŭ Turcyi paśla sproby pieravarotu ŭ lipieni 2016 hoda. Indže značnuju častku svajoj kampanii pryśviaciŭ abiacańniam budavać fabryki, stvarać novyja pracoŭnyja miescy, a taksama davać źnižki na dyzielnaje paliva fiermieram.
Paralelna ź Indže ŭ Stambule šerah mitynhaŭ pravodzić i dziejny prezident Turcyi Redžep Taip Erdahan. Na praciahu dnia jon piać razoŭ vystupić z pramovaj pierad svaimi prychilnikami ŭ roznych rajonach horada.
Vialikaja ŭvaha kandydataŭ da stambulskich vybarščykaŭ abumoŭlena tym, što tut pražyvaje adna piataja častka 80-miljonnaha nasielnictva respubliki. Čakajecca taksama, što Erdahan i Indže zaŭtra prahałasujuć na vybarach mienavita ŭ Stambule.
Daterminovyja parłamienckija i prezidenckija vybary ŭ Turcyi zapłanavanyja na niadzielu, 24 červienia, heta značyć amal na paŭtara hoda raniej zapłanavanaha terminu — u listapadzie 2019 hoda. Paśla hetaha ŭ krainie aficyjna ŭstupiać u siłu papraŭki ab uviadzieńni prezidenckaj sistemy kiravańnia.
Kandydaty na vybarach
U prezidenckaj honcy biaruć udzieł šeść kandydataŭ: dziejny prezident Taip Erdahan, kandydat ad asnoŭnaj apazicyjnaj Narodna-respublikanskaj partyi Mucharem Indže, kandydat ad apazicyjnaj «Dobraj partyi» Mierał Akšenier, kandydat ad Partyi dabrabytu Temiel Karamałaohłu, kandydat ad partyi «Radzima» Dohu Pierynček i kandydat ad kurdskaj Partyi demakratyi narodaŭ Siełachacin Dziemirtaš.
Da parłamienckich vybaraŭ Vyšejšaja vybarčaja kamisija dapuściła 11 palityčnych partyj. Heta Partyja spraviadlivaści i raźvićcia, Partyja nacyjanalistyčnaha ruchu, Narodna-respublikanskaja partyja, Partyja dabrabytu, partyja «Radzima», Niezaležnaja partyja baraćby, Partyja demakratyi narodaŭ, «Dobraja partyja», Partyja niezaležnaj Turcyi, Partyja vialikaha adzinstva, Demakratyčnaja partyja.
