Alena Patupa, biznes-vumen
Alena Patupa, dačka hanarovaha staršyni sajuza pradprymalnikaŭ Alaksandra Patupy, naminavanaja na prestyžnuju mižnarodnuju premiju Stevie Awards u katehoryi «Najlepšamu pradprymalniku ŭ sfery absłuhoŭvańnia».
Premiju Stevie Awards hazeta New York Post nazyvaje «Oskaram dla biznesoŭcaŭ». Pieramožca premii budzie abvieščany 14 listapada padčas ŭračystaha viečara ŭ «Markiz-Hateli» ŭ Ńju-Jorku.
Alena Patupa vyrasła ŭ Miensku, u 20 hod skončyła Instytut pravaznaŭstva, pierajechała ŭ ZŠA. U štacie Ńju-Džerzi atrymała stupień mahistra ŭ sfery biznes-administracyi va Universytecie Dykinsana. Blizu 10 hod pracuje ŭ sfery internet-prodažaŭ. U 2004 na ahulnaamerykanskim konkursie kamercyjnych sajtaŭ atrymała ŭznaharodu Golden Link («Załatoje złučvo») za inavacyjny padychod pry pabudovie internet-staronak. Hod tamu Alena ŭžo była finalistkaj premii Stevie Awards pa toj ža katehoryi.
Alena Patupa adkryła sakret amerykanskaj dušy — štataŭcy lubiać źnižki bolš za rečy, jakija kuplenyja pa hetych źnižkach.Sejły, abo rasprodažy, u Amerycy — varjactva ŭ nacyjanalnym maštabie. Tut navat źjaviłasia žartoŭnaja prymaŭka: «Nia važna, kolki ty zarablaješ, važna, jak tanna ty kuplaješ». Alaksandar Patupa, baćka Aleny kaža, što ciapier, kali Štaty chapiŭ ekanamičny kryzys i kali amerykancy achvotniej nabyvajuć tavary sa źnižkami, biznes Aleny tolki kvitnieje».
Usio pracuje tak: Alena, uładalnica sajta Wow-Coupons.com, źviartajecca da jakoj-niebudź bujnoj sietki kramaŭ i prosić u jaje dazvołu zrabić źnižku na niejki tavar. Potym zadarma «razdaje» praź Sieciva kupony, jaki dajuć ekśluzyŭnaje prava kupić toj tavar za źnižkaj («tolki razdrukuj i zachavaj!» — kaža reklama na sajcie). Usie zadavolenyja — Alena maje peŭny adsotak ad prodažu tavaru, a handlovaja sietka taksama ŭ prybytku — ludzi, padaachvočanyja kuponami sa źnižkaj, bolš zavitvajuć pa pakupki. U dadatak Alena prydumała dla svaich kuponaŭ zapaminalnuju nazvu Wow-coupon. Spradviečna-amerykanski Vyhuk «Vaŭ!» vyražaje šyroki spektar pačućciaŭ: ad ździŭleńnia da krykaŭ žarści. Wow-coupon na biełaruskuju možna pierakłaści pryblizna, jak «Uch-ty-jaki-kupon!».
«Vyśviatlajecca, što dla pracujučaj maci-adzinočki prodažy praź internet taki mohuć być surjoznym zaniatkam, — kaža Alena, i dadaje: —
«Ja takaja: maładaja menedžerka, nosam čuju vyhadnuju ździełku, maju zdolnaści i syna, jaki zasłuhoŭvaje ŭsiaho najlepšaha».
