22 maja Alaksandr Łukašenka zładziŭ čarhovy kadravy dzień. Vialikich pierastanovak nie było, ale možna źviarnuć na niekalki drabniejšych pryznačeńniach. «Naša Niva» sabrała cikavyja fakty ab ludziach, jakija ciapier čaściej buduć fihuravać u ŚMI.
Atrymaŭ miašok bulby ad Łukašenki
Namieśnikam staršyni Biełteleradyjokampanii staŭ 34-hadovy Siarhiej Husačenka. Padobna, što svaich kadraŭ na kirujučyja pasady padciahvaje novy staršynia Ivan Ejsmant. U fejsbuku jaho žonki Natalli Ejsmant, pres-sakratarki Łukašenki, jość fota, dzie jana razam z Husačenka i Volhaj Makiej słuchaje kłasiku la minskaj ratušy.
Husačenka minčuk, vučyŭsia na žurfaku BDU. U hety čas supracoŭničaŭ z roznymi vydańniami, u tym liku z «Našaj Nivaj». Potym pajšoŭ pracavać žurnalistam na BT. Apošnim časam uznačalvaŭ Ahienctva televizijnych navin.
Siarhiej Husačenka. Fota facebook.com.
Jak žurnalist zapomniŭsia svaim repartažam pra šviedskaha pasła Stefana Eryksana. Husačenka zajaŭlaŭ, što na bazie pasolstva rychtavali ekstremistaŭ, jaki pavinny byli ładzić vuličnyja pahromy. Byli niehatyŭnyja materyjały pra ŭkrainski Majdan.
Letaś Siarhiej Husačenka pabraŭsia šlubam ź inšaj viadučaj BT — Volhaj Makiej. Admietna, što Alaksandr Łukašenka padaryŭ maładym na viasielle miašok bulby. Nie kožnamu žurnalistu BT Łukašenka robić padarunki. Na viasielli byli Ivan i Natalla Ejsmanty.
Z pres-sakrataroŭ — u Stakholm
Dźmitryj Mirončyk. Fota sb.by.
My ŭžo zhadali dypłamatyčny biełaruska-šviedski kanflikt 2012 hoda, jaki adbyŭsia paśla taho, jak na terytoryju našaj krainy zalacieŭ šviedski samalot, što staŭ skidvać plušavych miadźviedzikaŭ. U vyniku Šviecyja zakryła pasolstva ŭ Minsku, a Biełaruś — u Stakholmie. Tolki letaś biełarusy znoŭ adkryli svajo pradstaŭnictva ŭ Šviecyi. I pieršym novym pasłom stanie Dźmitryj Mirončyk, jaki čatyry hady vykonvaŭ funkcyi pres-sakratara MZS.
Mirončyk pracuje ŭ MZS ad 1998 hoda. U jaho dypłamatyčnaj karjery majecca dośvied pracy za miažoj, ad 2001 da 2005 jon pracavaŭ u pasolstvie Biełarusi ŭ Hiermanii, a ad 2008 da 2013 byŭ daradcam pa handlova-ekanamičnych pytańniach u pasolstvie ŭ Italii. Pres-sakratarom MZS staŭ u lutym 2014.
U svajoj pracy Mirončyk dastatkova šmat karystaŭsia biełaruskaj movaj. Achvotna davaŭ kamientary dla niezaležnych ŚMI.
Heta častaja praktyka, što pres-sakratar MZS jedzie pracavać pasłom u budučyni. Tak było z papiarednikam Mirončyka Andrejem Savinych, jaki staŭ pasłom u Turcyi, hetak kaliści było z Paŭłam Łatuškam, jaki adpraviŭsia ŭ Polšču.
Fizik zamiest kamunista
Hienadź Palčyk (źleva) u čas pracy ŭ Licei BDU. Fota 90s.by.
Zamiest historyka z kamunistyčnymi pohladami Marata Žylinskaha Akademiju kiravańnia pry prezidencie ŭznačalić fizik-funkcyjanier Hienadź Palčyk.
Novamu rektaru kuźni čynavienskich kadraŭ 56 hadoŭ, jon rodam z Navahrudka. Vučyŭsia ŭ BDU na fizika, potym tam ža vykładaŭ.
Ad 1992 da 2004 hadoŭ jon byŭ dyrektaram Liceja BDU, adnoj z najlepšych siarednich navučalnych ustanovaŭ Biełarusi. U licej źbiralisia talenavityja dzieci z usioj krainy.
«Pamiatajecie, jak nam va ŭniviersitecie kazali: «Toje, čamu ciabie navučyli ŭ škole, zabudź»? A śledam — na zavodzie: «Toje, čamu ciabie vučyli va ŭniviersitecie, — niepatrebščyna. Zabudź, vučysia nanoŭ, vučysia na praktycy». Dyk heta ž treba likvidavać, naładziŭšy pierajemnaść adukacyi. Licej — heta nie fabryka vydatnikaŭ, nie štampoŭka miedalistaŭ. Licej — heta pačatak univiersiteckaj adukacyi», — kazaŭ Palčyk u adnym ź intervju.
Potym Palčyk pierajšoŭ na pracu ŭ Nacyjanalny instytut adukacyi. U 2012 staŭ deputatam Pałaty pradstaŭnikoŭ, bałatavaŭsia pa Jasieninskaj akruzie №100, dzie žyvie bahata studentaŭ. Adnym z tych, chto sprabavaŭ bałatavacca pa toj akruzie, byŭ staršynia AHP Anatol Labiedźka.
U parłamiencie ačolvaŭ kamisii pa adukacyi, navucy i kultury. Ale jašče da skančeńnia terminu byŭ pryznačany staršynioj Vyšejšaj atestacyjnaj kamisii.
U Palčyka dvoje synoŭ. Adzin ź ich — Andrej — vykładaje na ekanamičnym fakultecie BDU.
BDUIR uznačaliŭ svoj
Vadzim Bohuš. Fota bsuir.by.
BDUIR uznačaliŭ vychavaniec hetaha ŭniviersiteta. Vadzim Bohuš nie tolki vučyŭsia, ale i pracavaŭ tut. Byŭ dacentam kafiedry abarony infarmacyi BDUIR, zahadčykam kafiedry mietrałohii i standartyzacyi. Potym pierajšoŭ na pracu prarektaram u Akademiju kiravańnia, adtul — u Statystyčny kamitet. Apošnim zapisam u pracoŭnaj knižcy Bohuša značyłasia pasada namieśnika ministra adukacyi.
Vadzimu Bohušu 43 hady, jon rodam z Babrujska. Doktar fizika-matematyčnych navuk. U 2002 hodzie atrymaŭ stypiendyju kiraŭnika dziaržavy dla talenavitych navukoŭcaŭ.
Letaś Bohuš vioŭ kruhły stoł ab prablemach biełaruskamoŭnaj adukacyi. U svajoj pramovie jon kazaŭ, što ŭ Ministerstva isnuje kompleksny płan pa padtrymcy biełaruskaj movy.
U Ministerstvie adukacyi Bohuš adkazvaŭ za ŭstupnyja vyprabavańni dla abituryjentaŭ, a taksama dałučeńniem Biełarusi da Bałonskaha pracesu.
Karlukievič vyznačyŭsia ź pieršym namieśnikam
Pavieł Lohki. Fota Siarhieja Hudzilina.
Pieršym namieśnikam ministra infarmacyi staŭ Pavieł Lohki. Čałaviek, jaki vielmi doŭhi čas uznačalvaŭ pres-słužbu kiraŭnika dziaržavy. Apošnija miesiacy jon byŭ namieśnikam ministra infarmacyi.
Paŭłu Lohkamu 46 hadoŭ, jon naradziŭsia ŭ Baranavičach. Vučyŭsia ŭ Minskim vajskova-kamandnym vučyliščy, słužyŭ u armii. Jak žurnalist pačaŭ siabie prajaŭlać u časopisie «Armija». Niadoŭhi čas prabyŭ karespandentam na telekanale ANT.
Mienavita adtul jaho ŭziali na pracu ŭ prezidenckuju pres-słužbu, u jakoj i adpracavaŭ amal dziesiać hadoŭ. Varta zaŭvažyć, što ŭ toj čas viedamstva było dastatkova zakrytym dla kantaktaŭ.
U 2013 Paŭła Lohkaha adpravili daradcam u pasolstva Biełarusi ŭ Maskvu. «Maskva — heta vydatny horad, pryhožy, ale ciažki dla žyćcia. Doma i mnie, i majoj siamji lepš, dychajecca tut lahčej», — skazaŭ Lohki paśla viartańnia ŭ Biełaruś.
«Ja aśvietnickija pieradačy lublu: historyja, padarožžy, što źviazana z pryrodaj. Tam, mnie možna i pahladzieć, i adpačyć adnačasova: National Geographic, Discovery, Viasat History», — raskazvaŭ Lohki ŭ intervju «Našaj Nivie».
