Usie miascovyja ludzi nazyvajuć hety cudoŭnuju pabudovu «domam Vadejkaŭ». Adnak nasamreč dom pabudavaŭ staršy brat Vacłava Ivanoŭskaha — Ježy.
Mienavita jon u 1930 h. uspadkavaŭ pałovu Hałavičpola, a Vadejkam u toj čas naležała druhaja pałova. Paśla 1930 hoda mienavita Ježy Ivanoŭski na miescy zharełaha stroha draŭlanaha, pabudavaŭ hety pryhožy dom.
A sprajektavaŭ jaho, akazvajecca, naš znakamity biełaruski architektar Lavon Vitan-Dubiejkaŭski.
Adnačasova z pabudovaj doma Ježy Ivanoŭski pasadziŭ novy sad na 10 ha. imavierna, z tych časoŭ niedaloka ad doma zachavałasia i aficyna.
Aficyna pobač z domam.
Viadoma, što pry kancy 1920-ch Dubiejkaŭski niejki čas vykładaŭ u Lidzie, a potym, u pieršaj pałovie 1930-ch, jon nastaŭničaŭ i pracavaŭ ŭ Biełaruskim instytucie haspadarki i kultury, adnaŭlaŭ klaštar u Drui, budavaŭ klaštar pad Varšavaju i mikrarajon na Antokali ŭ Vilni. U druhoj pałovie 1930-ch hadoŭ z-za ciažkaj chvaroby architektar praktyčna nie pracavaŭ. Pra jahonaje aŭtarstva doma ŭ Hałavičpole, zdajecca, mastactvaznaŭcy jašče nie viedajuć.
Ježy Ivanoŭski padčas Druhoj suśvietnaj vajny słužyŭ u polskim vojsku na Zachadzie i zastaŭsia žyć u Anhlii. U savieckija časy dom, sprajektavany architektaram Vitan-Dubiejkaŭskim, staŭ školnym internatam, a siońnia naležyć parafii kaścioła ŭ Starych Vasiliškach. Darečy, Ivanoŭskija byli adnymi z fundataraŭ budaŭnictva hetaha pryhožaha kaścioła ŭ styli nieahotyki.
Infarmacyju pra aŭtarstva Vitan-Dubiekaŭskaha možna spraŭdzić u 6-tym tomie encykłapiedyi «Ziemleŭłaśniki Polščy XX st» (Ziemianie polscy XX wieku. Słownik biograficzny, część 6. Warszawa 2002. S. 58—59.), adkul i ja daviedaŭsia pra sapraŭdnuju historyju doma, jaki zacikaviŭ mianie šmat hadoŭ tamu.
Mahčyma, raniej ja pamylaŭsia z vyznačeńniem stylu hałavičpolskaha doma. Moža, heta ŭsio ž nie «zakapanski», a «biełaruski» architekturny styl, ale vyznačać heta treba admysłoŭcam, da jakich ja, viadoma ž, nie naležu. U lubym vypadku, turystyčnaja pryvabnaść miastečka paśla vyznačeńnia aŭtarstva Vitan-Dubiejkaŭskaha pavinna pavialičycca, tym bolš što Labiodka Ivanoŭskich zusim blizka.
I treba uziać hety dom pad dziaržaŭnuju achovu jak pomnik architektury.
