Ministerstva justycyi dasłała list na adras Nacyjanalnaha kamitetu AHP. Pradmietam uvahi zrabilisia pavodziny staršyni partyi Anatola Labiedźki.
Spasyłajučysia na niekatoryja publikacyi (na «Biełorusskich novostiach», radyjo «Svaboda» i na našym sajcie www.ucpb.org), Ministerstva justycyi narakaje na dziejańni Anatola Labiedźki: jak heta jon vyjšaŭ na Kastryčnickuju płošču, kab pratestavać z nahody falsyfikacyjaŭ na «parlamenckich vybarach».
Ministerstva justycyi nahadała, što ŭ adpaviednaści z zakanadaŭstvam «asoba, jakaja vystupaje ad imia jurydyčnaj asoby, pavinna dziejničać dobrasumlenna i razumna».
Na hetaj padstavie načalnik Upraŭleńnia hramadzkich abjadnańniaŭ A.Śližeŭski, jaki padpisaŭ list, vykazvaje mierkavańnie, što AHP u svajoj dziejnaści nie vykonvaje «pryncypy demakratyzmu i zakonnaści».
Da taho ž havorka ŭ liście idzie pra «tak zvanuju «Palitradu ADS».
«Ja nasamreč zaklikaŭ 28 vieraśnia vychodzić na akcyju pratestu, — kaža staršynia AHP Anatol Labiedźka. — Ale pry čym tut Abjadnanaja hramadzianskaja partyja? Što ž da ADS, dyk, kali ŭ Ministerstva justycyi majecca zakłapočanaść losam kaalicyi, niachaj hetaje viedamstva zrobić prapanovu palityčnym partyjam aficyjna jaje zarehistravać. Taki padychod jakraz i budzie adpaviadać pryncypam demakratyzmu i zakonnaści».
