U Biełarusi raspracoŭvajecca prahrama kompleksnaj madernizacyi žyłoha fondu, prajekciroŭščyki pracujuć nad novymi prajektami damoŭ, jakija buduć aciaplacca elektryčnaściu. A voś pierachod na stopracentnuju kamunałku nam pakul nie pahražaje. Pra heta raspavioŭ vice-premjer Anatol Kalinin na adkryćci dvaccataj śpiecyjalizavanaj vystavy «Vada i ciapło», paviedamlaje Tut.by.
Prahrama pa madernizacyi raspracoŭvajecca sumiesna ź ministerstvam ŽKH, raspavioŭ Anatol Kalinin.
— Jak minimum 70% žyłoha fondu pavinny madernizavać i ŭ 1,5-2 razy źnizić enierhazatraty. Heta adna z hałoŭnych zadač u śfiery žyllova-kamunalnaj haspadarki.
Vice-premjer taksama padkreśliŭ, što miarkujecca «vyrašyć pytańni pa taryfnaj palitycy», kab taryf na ciepłavuju enierhiju byŭ roŭny taryfu na elektryčnuju enierhiju. «Tady ŭ spažyŭca budzie vybar», — ličyć vice-premjer.
Na pytańnie, kali budziem płacić za ciepłavuju enierhiju 100%, Kalinin vykazaŭ zdahadku, što «heta adbudziecca paralelna z rostam dachodaŭ nasielnictva».
— Moža być, heta budzie 2025 h., moža paźniej.
Pakul, pa słovach vice-premjera, nasielnictva kampiensuje tolki 18-20% koštu ciepłavoj enierhii. Nahadajem, takija ž ličby ŭ lutym nazyvaŭ namieśnik hiendyrektara «Biełenerha» Siarhiej Šabieka: «Nasielnictva kampiensuje kala 80% vydatkaŭ na elektraenierhiju, 20% — na ciepłavuju».