Enierhaefiektyŭny dom druhoha pakaleńnia ŭ Hrodnie siońnia — heta samy technałahična abstalavany žyły budynak u našaj krainie. U Biełarusi pabudavali try takija damy budučyni. Na ich prykładzie płanujuć pakazać, jak ŭkaranieńnie najnoŭšych technałohij dazvalaje ŭładalnikam kvater ekanomić na aciapleńni i haračym vodazabieśpiačeńni, piša Realty.tut.by
Piłotnyja damy ŭ Hrodnie, Minsku i Mahilovie asnaścili enierhaefiektyŭnymi sistemami na srodki Hłabalnaha ekałahičnaha fondu. Heta ekśpierymientalnyja šmatkvaternyja damy, pabudavanyja pa typavych prajektach, ale z roznym naboram technałohij. Kančatkovaja meta — stvaryć typavyja prajekty, kab ich možna było budavać pa ŭsioj krainie.
U kvaterach zrabili vientustanoŭki ź mienšaj pradukcyjnaściu (140 suprać 400 m3/h), ź vientylataram mahutnaściu ŭsiaho 27 Vt. TEN dla dadatkovaha padahrevu pavietra, kali nieabchodna ŭ vialiki maroz — usiaho 500 Vt. Vientylacyja maje 9 uzroŭniaŭ mahutnaści, abstalavana aŭtamatykaj, jakaja dazvalaje zaprahramavać pracu pa hadzinach i dniach tydnia.
Ciapło z kanalizacyi
Vydatki ciapła na abahravańnie doma skaracili ŭ 3-3,5 razy ŭ paraŭnańni sa standartnymi damami. Usio, dziakujučy vykarystańniu enierhii ziamli z dapamohaj ciepłavych pompaŭ. Na hłybini niekalkich mietraŭ tempieratura hruntu zaŭsiody stanoŭčaja. Heta dazvalaje, vykarystoŭvajučy 1 kVt · h elektraenierhii, atrymlivać 3-4 kVt · h ciepłavoj.
Kab zabiaśpiečyć ciapłom dom, znajšłosia jašče adno, bolš cikavaje, rašeńnie. Pobač z budaŭničaj placoŭkaj na hłybini 4 mietraŭ prachodzić dziejučy kalektar haradskoj kanalizacyi. Tempieratura ściokaŭ u im nie apuskajecca nižej za plus 17 hradusaŭ na praciahu ŭsiaho hoda. Śpiecyjalisty skanstrujavali ciepłaabmieńnik ź nieržaviejučaj stali. Jaho trubu ŭstalavali zamiest 50-mietrovaha ŭčastka haradskoha kalektara. Enierhija ściokavych vod, jakaja sychodziła ŭ nikudy, vykarystoŭvajecca dla abahrevu kvater. Ciapier jość ciepłanośbit dla sistemy aciapleńnia i padahrevu haračaj vady z tempieraturaj da 45 hradusaŭ.
Utylizatar taksama patrebien
Ciapło z kvater sychodzić nie tolki z pavietram, ale i źlivajecca z vykarystanaj haračaj vadoj u kanalizacyju. U ekśpierymientalnym domie ŭ padvalnym pamiaškańni ŭstanavili ŭtylizatary ciapła ściokavych vod. U ich nakiroŭvajucca tak zvanyja šeryja ścioki ad vannaŭ, pralnych mašyn. Ścioki ad kuchonnaj myjki i ŭnitaza sychodziać u kanalizacyju pa asobnaj trubie.
Šeryja ścioki prachodziać praź śpiecyjalny ciepłaabmieńnik i častkova padahravajuć vadu dla haračaha vodazabieśpiačeńnia. Tearetyčna ŭtylizatar dapamoža zekanomić da 30% na nahrevie haračaj vady dla bytavych patreb.
Utylizatar biełaruskaj vytvorčaści.
Soniečnuju enierhiju bolš vyhadna pradavać
Dla kampiensacyi vydatkaŭ elektraenierhii, jakaja vydatkoŭvajecca na pracu ciepłavych pompaŭ, na paŭdniovym fasadzie i dachu raźmiaściłasia cełaja soniečnaja elektrastancyja. Ahulnaja płošča soniečnych panelaŭ - 250 m². Mahutnaść — 74 kVt.
Praŭda, z soniečnaj elektraenierhijaj isnujuć całkam abjektyŭnyja siezonnyja prablemy, atrymlivajecca taki dysbałans — uletku dom vypracoŭvaje bolš enierhii, čym vykarystoŭvaje, a zimoj bolš spažyvaje, čym hienieruje. Tamu pieršapačatkova płanavałasia, što ŭsia hienieravanaja soniečnaj stancyjaj enierhija budzie pradavacca ŭ ahulnuju sietku pa isnujučym padvyšanym taryfie (49 kapiejek za 1 kVt · h), a enierhija, nieabchodnaja domu, kuplacca pa zvyčajnych taryfach (pa 14 kapiejek). Ale pakul hetaje pytańnie nie vyrašana.
Usie kvatery ŭ domie ŭžo raskupili. Heta kamiercyjnaje žyllo, kvatery pradavalisia ŭ siarednim pa 600 dołaraŭ za mietr. Zabudoŭščyk — «Hrodnažyłbud». Prajekt doma jamu spadabaŭsia, i jon hatovy budavać takija ž damy, tolki ź inšymi opcyjami: chutčej za ŭsio, admovicca ad ciepłavych pompaŭ, ale voś pakvaternuju vientylacyju z rekupieracyjaj i ŭtylizacyjaj ciapła šerych ściokaŭ pakinie.
