Naziraju, jak naš narod uparta choča bačyć va ŭsim niehatyŭ. Košty na čyhunačnyja kvitki ŭ Biełarusi — adny z najnižejšych u Jeŭropie (tańniejšyja tolki va Ukrainie i Małdovie): elektryčkaj ci dyzielem za 1 jeŭra možna prajechać 150 kiłamietraŭ, za 2 jeŭra z kapiejkami takuju adlehłaść možna prajechać chutkim ciahnikom. Košty padniali krychu, kab ledź-ledź padvysić akupnaść — i ludzi ŭ sacsietkach i kamientarach užo narakajuć, aburajucca, što čyhunka ź ich dziare.
A čyhunka nie dziare, pasažyry płaciać nievialikuju častku ad realnaha koštu pieravozki. Bolšaść vydatkaŭ na pasažyrskija pieravozki Biełčyhunka pakryvaje za košt prybytkaŭ ad hruzavoha tranzitu.
Ale tych, chto jeździć čyhunkaj, čakajuć horšyja naviny, čym padaražeńnie kvitkoŭ. Z 2013 da 2017 hoda Biełaruskaja čyhunka parezała na mietałałom 24 dyziel-ciahniki. I da 2020 hoda płanuje parezać jašče 29.
Dyziel-ciahnik DR1. Takija ciahniki absłuhoŭvajuć bolšaść pryharadnych pieravozak u Bresckaj, Homielskaj i Hrodzienskaj abłaściach, adnak pastupova śpisvajucca praz staraść. Fota trainpix.org.
Elektraciahniki Biełaruskaja čyhunka nie reža, adnak kolkaść elektryfikavanych učastkaŭ na BČ uzrasła amal na 300 kiłamietraŭ (linii Asipovičy — Homiel i Maładziečna — Hudahaj). Nieŭzabavie elektryfikujuć jašče liniju Žłobin — Kalinkavičy. Pry hetym BČ nie kuplała novyja elektraciahniki dla pryharadnaha ruchu na hetych linijach. Kab absłužyć novyja linii, skaracili kolkaść elektryčak u minskim vuźle. Ale minskija elektryčki, jakija pryjšli ŭ Homiel i Hudahaj, zdoleli zamianić śpisanyja dyziel-ciahniki. Dalej padobnaha reziervu dla zamieny nie budzie.
Dyziel-ciahniki DDB1 na stancyi Kruleŭščyna. U roznych kutkach Biełarusi dyziel-ciahniki zabiaśpiečvajuć žyćciovyja patreby žycharoŭ pravincyi: tanny i chutki dajezd da rajonnych i abłasnych centraŭ. Fota Kastusia Šytala.
Sučasny dyziel-ciahnik DP3 polskaj firmy Pesa na stancyi Parafjanaŭ. Ciahnik źviazaŭ Minsk i Połack za try z pałovaj hadziny, ale prachodzić bolšaść stancyj biez prypynku. Žychary Parafjanava musili źbirać podpisy, kab pierakanać kiraŭnictva čyhunki dadać novamu ciahniku prypynak u Parafjanavie. Fota Kastusia Šytala.
Za apošnija hady BČ nabyła ŭsiaho try ciahniki dla pryharadnych pieravozak — heta adnavahonnyja ciahniki DP1, prypisanyja da depo Kalinkavičy, jakija absłuhoŭvajuć maršruty Kalinkavičy — Słaviečna i Kalinkavičy — Chojniki.
Prajekt «Haradskija linii» ŭ Minsku nie biarom u raźlik — ciahniki da Rudzienska i Zasłaŭja pieraniali na siabie častku nahruzki z rehijanalnych elektraciahnikoŭ, adnak ich dabradziejstvy abmiežavanyja vakolicami Minska.
BČ nie płanuje da 2020 hoda nabyvać ruchomy skład dla pryharadnych pieravozak. Heta aznačaje, što budzie dalejšaje skaračeńnie pryharadnych ciahnikoŭ: i na hety raz užo nie na linijach, jakija prylahajuć da Minska, a na Homielščynie, Bieraściejščynie i Haradzienščynie: ciahniki DR1, jakija kursujuć tam, majuć pajści pad nož.
Tym časam Biełaruskaja čyhunka robić staŭku na nabyćcio sučasnaha ruchomaha składu dla mižharodnich pieravozak: elektraciahniki Stadler i dyziel-ciahniki Pesa, jakija kursujuć na hetak zvanych linijach biznes-kłasa pamiž vialikimi haradami. U minułyja hady było nabyta 18 takich ciahnikoŭ, da 2020 hoda płanujecca nabyć jašče 12. Viciebsk, Mahiloŭ i Harodnia atrymajuć narešcie chutkuju kamunikacyju ź Minskam.
Adnak dabradziejstvam chutkich ciahnikoŭ zmohuć karystacca tolki žychary haradoŭ, jakija lažać pry hałoŭnych čyhunačnych mahistralach. Užo žycharam miastečak, takich jak Parafjanava ci Padśville, treba advajoŭvać z bojem prypynki novych ciahnikoŭ. A starych ciahnikoŭ budzie mieniej, i tam, dzie dyzieli ciapier chodziać 3—4 razy na sutki, kolkaść rejsaŭ moža skaracicca da dvuch. U sotni, navat tysiačy nasielenych punktaŭ Biełarusi budzie ciažej dabiracca.
