Miensk, 20 sakavika (aŭtorak) — 19.00, Kulturny inkubatar Ok16, vuł. Kastryčnickaja, 16
Horadnia, 23 sakavika (piatnica) — 18.30, etnakrama «Cudoŭnia», vuł. Kirava, 3.
Siarhiej Šupa
Aŭtar «Padarožža ŭ BNR» žurnalist Radyjo Svaboda Siarhiej Šupa raskazaŭ pra knihu tak:
«Niejak stałasia tak, što mnie daviałosia pražyć niekalki hadoŭ u Biełaruskaj Narodnaj Respublicy. Nu nia tak, viadoma, što ja trapiŭ u niejkuju piatlu času, jakaja zakinuła mianie na 100 hadoŭ nazad. Ale ja pierabraŭ da apošniaj staronki ŭsie tyja tysiačy i tysiačy dakumentaŭ, što zachoŭvajucca ŭ mienskich i vilenskich archivach, pieračytaŭ mnostva tahačasnych hazet Biełarusi i navakolnych krainaŭ na ŭsich dastupnych movach, sačyŭ za manahrafijami i artykułami na temu.
Dvaccać hadoŭ tamu praduktam hetaj apantanaści stali dźvie knihi «Archivaŭ BNR». Heta mianie troški adpuściła, i ja pamału adyšoŭ ad hetaj temy. Dumałasia: nu voś, dakumenty naźbiralisia, jašče vyjdzie taki samy tom ź mienskaj častkaj — i pačnie źjaŭlacca niejki novy tvorčy plon. Bo materyjału i dla navuki, i dla litaratury tam dastatkova.
Adnak taho, čaho ja čakaŭ, ja tak i nie dačakaŭsia. Navukoŭcy, praŭda, nie padviali — źjaŭlajecca niamała novych pracaŭ, jakija pašyrajuć i pahłyblajuć temu. A voś papularnaj litaratury — nie vidać.
Dyk i vyrašyŭ ja sieści i pierakazać usio pračytanaje i pieražytaje prostymi słovami — tym, kamu cikava i chto nia maje času vyšukvać załacinki ŭ mory dakumentalnaha materyjału».
Kniha vyjšła pad redakcyjaj Alaksandra Łukašuka. Mastackaje afarmleńnie: Hienadź Macur. Karektar: Vincuk Viačorka.
Pradmova dyrektara Radyjo Svaboda Alaksandra Łukašuka da knihi «Padarožža ŭ BNR»:
Uniz pa leśvicy, što viadzie ŭvierch
U minułaje možna ŭpaści, jak u biezdań, možna
ŭźlacieć, jak u maru, a možna spuścicca, jak pa
leśvicy, dzie pad kožnaj prystupkaj zakładzienaja
mina — krok za krokam, luby ź jakich moža stać
apošnim, i tamu nielha ničoha prapuścić i treba
ŭsio spraŭdzić na svaje vočy i pieramacać svaimi
rukami:
cydułku za cydułkaj,
list za listom,
daviedku za daviedkaj,
rachunak za rachunkam,
order za orderam,
mandat za mandatam,
paśviedčańnie za paśviedčańniem,
raśpisku za raśpiskaj,
zahad za zahadam,
memarandum za memarandumam,
telehramu za telehramaj,
pratakoł za pratakołam,
pastanovu za pastanovaj,
akt za aktam,
hramatu za hramataj, —
I tolki tady možna zaprašać u hetaje padarožža
inšych i, kudy b jany ni jšli, jany vyjduć na
śviatło, bo hetaja leśvica zaŭsiody viadzie ŭvierch.
* * *
U Miensku ŭ sustrečy voźmuć udzieł historyki i piśmieńniki Natalla Hardzijenka, Vincuk Viačorka, Siarhiej Dubaviec, Siarhiej Chareŭski i Alhierd Bacharevič.
Taksama budzie pradstaŭlena novaje dapoŭnienaje vydańnie knihi staršyni Rady BNR Ivonki Surviły «Daroha». Aŭtarka vystupić ź videazvarotam.
Novyja knihi «Biblijateki Svabody» prysutnyja atrymajuć u padarunak.
Prychodźcie ź siabrami!