Režym Kim Čen Ira kuplaje zbroju zamiest taho, kab karmić svaich hramadzianaŭ. Heta mahčyma, tamu što Paŭnočnaja Kareja atrymlivaje charčovuju dapamohu z usiaho śvietu, śćviardžajuć parłamientaryi z Paŭdniovaj Karei.
Paŭnočnaja Kareja maje adno z samych vialikich vojskaŭ na śviecie i ciaham apošnich piaci hod patraciła na zbroju 65 miljardaŭ dalaraŭ, niahledziačy na toje, što nasielnictva krainy haładaje. Zbroju režymu Kim Čen Ira pradaje nia tolki Kitaj, ale i Rasija, Hiermanija, Słavakija. Hetyja dadzienyja ahučyŭ adzin z paŭdniovakarejskich deputataŭ, spasyłajučysia na dadzienyja raźviedki.
Na siońniašni dzień vojska Paŭnočnaj Karei (23 miljony žycharoŭ) naličvaje bolej za 1,7 miljona sałdat. Utrymańnie takoha vialikaha vojska vyciahvaje 25 % usiaho nacyjanalnaha biudžetu. Režym moža sabie heta dazvolić, bo jon atrymlivaje charčovuju dapamohu ad šmatlikich krainaŭ i arhanizacyj, u tym liku ad Arhanizacyi Abjadnanych Nacyj i Paŭdniovaj Karei.
Abrany ŭ hetym hodzie kanservatyŭny prezident Paŭdniovaj Karei Li Mion Bak abvieściŭ, što jon spynić dapamohu režymu Kim Čen Ira i vyśvietlić, što kuplałasia na hrošy, jakija išli na Poŭnač.
Tym časam Suśvietnaja charčovaja prahrama AAN, jakaje zajmajecca dapamohaj rehijonam, u jakich panuje hoład, prahnazuje, što hety hod moža być adnym z najhoršych dla nasielnictva Paŭnočnaj Karei i što bolej za 6 miljonaŭ ludziej mohuć nie mieć stałaha charčavańnia.
Ale režym Kim Čen Ira heta nia vielmi niepakoić. Jon abvieściŭ pra adnaŭleńnie atamnaj prahramy, pahražajučy, što ŭ vypadku, kali Paŭnočnaja Kareja nie atrymaje ježy, nafty i hrošaj, Zachad moža navat nia maryć ab atamnym razzbrajeńni.
