Chokinh pramaŭlaŭ ich pry dapamozie svajho znakamitaha sintezatara maŭleńnia. Ad pryčyn isnavańnia Suśvietu da staŭleńnia da žyćcia: my vybrali samyja viadomyja ź jahonych cytat.
Pra cikavaść da kosmasu: «Ja dumaju, što žyćcio na Ziamli pastajanna znachodzicca pad pahrozaj źniščeńnia, naprykład, u vyniku jadziernaj vajny, hienietyčnaha virusa abo inšych trahiedyj. Ja dumaju, što ŭ čałaviectva niama budučyni, kali jano nie adpravicca ŭ kosmas. Tak što ja chaču pavysić hramadskuju cikaŭnaść da kosmasu».
Ab inšapłaniecianach: «Kali inšapłaniecianie kali-niebudź naviedajuć nas, ja dumaju, što vynik budzie taki ž sumny, jak i dla karennych amierykancaŭ, kali Chrystafor Kałumb vysadziŭsia na bierah Amieryki».
Ab čornych dzirach: «Ejnštejn nie mieŭ racyi, kali skazaŭ: «Boh nie hulaje ŭ kości». Vyvučeńnie čornych dzir pakazvaje, što Boh nie tolki hulaje ŭ kości, ale i časam padmanvaje nas, kidajučy ich tudy, dzie my nie možam ich bačyć».
Ab Suśviecie: «My ŭsiaho tolki raźvityja naščadki małpaŭ na maleńkaj płaniecie ź ničym nie charakternaj zorkaj. Ale ŭ nas jość šancy spaścihnuć Suśviet. Heta i robić nas asablivymi».
Pra pryčyny isnavańnia Suśvietu: «Kali budzie znojdzieny adkaz na hetaje pytańnie, heta budzie poŭnym tryumfam čałaviečaha rozumu, bo tady nam stanie zrazumiełaja zadumka Boha».
Ab paralelnych suśvietach (ź intervju komiku Džonu Olivieru):
— Vy niejak skazali, što isnuje biaskoncaja kolkaść paralelnych suśvietaŭ, značyć, tearetyčna jość suśviet, dzie ja razumniejšy za Vas?
— Tak. A jašče jość suśviet, dzie Vy śmiešny.
Pra čałavieka: «Siarod usich sistem, jakija ŭ nas jość, samyja składanyja — heta našy ŭłasnyja cieły».
Ab kamiercyjnym pośpiechu: «Usio svajo žyćcio ja dziviŭsia tym hałoŭnym pytańniam, ź jakimi nam davodzicca sutykacca, i sprabavaŭ znajści dla ich navukovy adkaz. Mahčyma, tamu ja pradaŭ bolš knih pra fiziku, čym Madonna pra seks».
«Niechta skazaŭ mnie, što kožnaje ŭraŭnieńnie, jakoje ja ŭklučaju ŭ knihu, skaračaje prodažy ŭ dva razy».
Ab słavie: «Dla maich kalehaŭ ja prosta jašče adzin fizik, ale dla šyrokaj publiki ja staŭ, mahčyma, samym viadomym navukoŭcam u śviecie. Zbolšaha tamu, što navukoŭcy, za vyklučeńniem Ejnštejna, nie padobnyja na rok-zorak, a zbolšaha tamu, što ja ŭpisaŭsia ŭ stereatyp invalida-hienija. Ja nie mahu schavacca za parykom abo ciomnymi akularami — majo kresła mianie vydaje».
Pra ciažkija žyćciovyja situacyi: «Kali vy adčuvajecie, što patrapili ŭ čornuju dziru, nie zdavajciesia. Vyjście jość».
Ab niedaskanałym śviecie: «Adnym z asnoŭnych praviłaŭ Suśvietu źjaŭlajecca toje, što niama ničoha daskanałaha. Daskanałaści prosta nie isnuje. Bieź niedaskanałaści ni vy, ni ja nie isnavali b».
Pra los: «Ja zaŭvažyŭ, što navat tyja ludzi, jakija kažuć, što ŭsio nakanavanaje i ničoha nielha źmianić, hladziać pa bakach, kali pierachodziać darohu».
Pra ludziej: «Cichija ludzi vałodajuć samymi hučnymi rozumami».
«Kali mnie spoŭniłasia 12, adzin z maich siabroŭ paspračaŭsia ź inšym na miašok cukierak, što ź mianie ničoha nie vyjdzie. Nie viedaju, ci zakončyłasia hetaja sprečka i na čyju karyść».
Pra rozum: «Hałoŭny vorah viedaŭ — nie nievuctva, a iluzija viedaŭ.»
Ab eŭtanazii: «Ja dumaju, heta było b pamyłkaj. Jakim by žachlivym ni zdavałasia žyćcio, zaŭsiody znojdziecca toje, u čym možna atrymać pośpiech. Pakul jość žyćcio, jość nadzieja».
Ab fizičnych abmiežavańniach: «Ja pražyŭ paŭnavartasnaje žyćcio i zadavoleny im. Ja vieru, što ludzi z abmiežavanymi mahčymaściami pavinny kancentravacca na rečach, u jakich ich niedachop nie źjaŭlajecca pieraškodaj, a nie škadavać pra toje, čaho jany nie mohuć rabić».
Ab svaim uniosku ŭ navuku: «Žyć, zajmajučysia daśledavańniami pa tearetyčnaj fizicy, — heta było cudoŭna. Ja ščaślivy, kali mnie ŭdałosia niešta dadać da našaha razumieńnia Suśvietu».
Pra śmierć: «Ja žyvu z prahnozam rańniaj śmierci apošnija 49 hadoŭ. Ja nie bajusia śmierci, ale i nie śpiašajusia pamirać: ja jašče chaču šmat čaho dabicca».
Žyćcio znakamitaha anhlijskaha fizika-tearetyka, papularyzatara navuki Styviena Chokinha abarvałosia ranicaj 14 sakavika 2018 hoda.
