Alaksandr Łukašenka 9 kastryčnika nakiravaŭsia z aficyjnym vizitam u Kyrhyzstan. Pra heta paviedamlaje pres‑słužba prezidenta.
10 kastryčnika ŭ Biškieku prezident Biełarusi voźmie ŭdzieł u pasiadžeńniach Savieta kiraŭnikoŭ dziaržaŭ SND i Miždziaržaŭnaha savieta Jeŭrazijskaj ekanamičnaj supolnaści.
Lidery krain SND razhledziać pierśpiektyvy ekanamičnaha i humanitarnaha supracoŭnictva, arhanizacyju biaśpieki i prablemy aptymizacyi raboty Sadružnaści. U pryvatnaści, paradak dnia ŭklučaje abmierkavańnie prajekta stratehii ekanamičnaha raźvićcia SND da 2020 hoda, pytańnia ab vyznačeńni supracoŭnictva ŭ halinie enierhietyki klučavoj śfieraj uzajemadziejańnia dziaržaŭ — udzielnic SND u 2009 hodzie, płana asnoŭnych mierapryjemstvaŭ pa padrychtoŭcy i śviatkavańni 65‑j hadaviny Pieramohi ŭ Vialikaj Ajčynnaj vajnie 1941—1945 hadoŭ.
Taksama nieabchodna razhledzieć pytańni ŭmacavańnia Sadružnaści jak mižnarodnaj arhanizacyi.
Na samicie JeŭrAzES prezidenty praanalizujuć vyniki realizacyi ŭžo dasiahnutych damoŭlenaściej i vyznačać pryjarytetnyja kirunki dziejnaści na najbližejšuju pierśpiektyvu.
Na razhlad kiraŭnikoŭ dziaržaŭ vynosiacca dakład hienieralnaha sakratara JeŭrAzES ab farmiravańni Mytnaha sajuza i adzinaj ekanamičnaj prastory ŭ ramkach supolnaści, pytańnie ab nadańni Jeŭrazijskamu banku raźvićcia statusu naziralnika pry JeŭrAzES i prajekt biudžetu JeŭrAzES na 2009 hod.
Udzielniki sustrečy abmiarkujuć prajekt mierapryjemstvaŭ na 2008—2010 i nastupnyja hady pa realizacyi pryjarytetnych kirunkaŭ raźvićcia JeŭrAzES. U im uličany nieažyćcioŭlenyja ŭ 2003—2007 hadach mierapryjemstvy pa farmiravańni enierhietyčnaha rynku, transpartnaha sajuza, uzajemadziejańni ŭ realnym siektary ekanomiki, a taksama pytańni charčovaj biaśpieki, supracoŭnictva ŭ sacyjalna‑humanitarnaj, ekałahičnaj śfierach, u halinie mihracyjnaj palityki, udaskanaleńnia sistemy kiravańnia JeŭrAzES.
U ramkach aficyjnaha vizitu 11 kastryčnika kiraŭnik biełaruskaj dziaržavy praviadzie dvuchbakovyja pieramovy z prezidentam Kyrhyzskaj Respubliki Kurmanbiekam Bakijevym, pa vynikach jakich płanujecca padpisańnie dakumientaŭ, «nakiravanych na pašyreńnie dahavorna‑pravavoj bazy ŭzajemadziejańnia ŭ roznych śfierach supracoŭnictva», paviedamlaje pres‑słužba.
