Ukraincy źniali 30-sieryjnuju karcinu «#Škoła», jaki raspaviadaje pra adnosiny padletkaŭ, ich nastaŭnikaŭ i baćkoŭ. Admietnaść sieryjała — usie piersanažy havorać na ŭkrainskaj movie.
U internecie źjaviłasia ŭžo bolš za pałovu sieryj. Treba skazać, siužet nie toje kab zakručany, akciory moža nie takija prafiesijnyja, jak u pryvyčnych užo dla nas amierykanskich i skandynaŭskich sieryjałach. I ŭsio ž aŭtary sprabujuć bracca za vielmi niaprostyja, važnyja prablemy: hvałt u siamji, padletkavyja samahubstvy, abjuz (a paprostu — ckavańnie, ździeki) z boku adnahodkaŭ. Viadoma, heta ŭsio praz prablemy lubovi, adnosin, reŭnaści, uzajemadapamohi jak u darosłym, tak i ŭ padletkavym kalektyvach.
Moža, formaj hety sieryjał padobny da anałahičnaj rasijskaj pradukcyi, ale pa sutnaści ŭsio ž adroźnivajecca. Ciažka ŭjavić sabie, kab u rasijskim sieryjale niechta ŭ dziaržaŭnych orhanach sistematyčna braŭ chabar ci, naprykład, kab pakazvali biaździejnaść palicyi. U scenarystaŭ «#Škoły» vidavočna niama iluzij adnosna realnaści, ale jość spadziavańni.
Nie ŭsie akciory adnolkava prafiesijnyja, praŭda, ź sieryi ŭ sieryju hrajuć usio lepš, kali nie ź pieršaj sieryi, to z treciaj u ich ihru pačynaješ vieryć. Najbolš prafiesijna, pa-mojmu, vyhladajuć dyrektar škoły (mudry, spakojny) i hałoŭnaja ścierva sieryjała, zavučycha Darja Piatroŭna (ź jakoj, jak z časam akazvajecca, nie ŭsio tak adnaznačna). Tym bolš ja była ździŭlenaja, kali vyjaviła, što vykanaŭca roli hałoŭnaj lichadziejki — vielmi miłaja aktrysa Alena Kurta, zasnavalnica dabračynnaha fondu, meta jakoha — zrabić ŭkraincaŭ ščaślivaj nacyjaj (mienavita tak!) praz reformy ŭ roznych śfierach.
Dva słovy pra saŭndtrek sieryjała. Heta novaja pieśnia hurtu «Antycieły», i jana sapraŭdy prosta niejmaviernaja. A klip na hetuju pieśniu raździraje dušu. U asnovu pakładziena historyja savieckaha akijanołaha Stanisłava Kuryłava. Jon maryŭ pahladzieć śviet, a saviety nie vypuskali jaho z krainy. Užo straciŭšy nadzieju, jon daviedaŭsia pra kruizny łajnier, jaki idzie z Uładzivastoka da ekvatara i nazad biez zachodu ŭ party inšych dziaržaŭ.
Tak u advažnaha akijanołaha źjaviŭsia płan. 13 śniežnia 1974 Kuryłaŭ skočyŭ za bort. 100 kiłamietraŭ prapłyŭ za dva dni — biez snu, ježy i pitva. Vypłyŭ na Filipinach. Źbieh! Možna tolki ŭjavić, što rabiłasia ŭ Maskvie, kali pra heta stała viadoma.
«O-o-o, ničoha nie bojsia, u kancy scenara chepi-end». Heta nastolki natchniony prykład baraćby za svaju svabodu i hodnaść! U klipie advažnaha ŭciekača syhraŭ Aleh Łysahor — ukrainski honar, šmatrazovy čempijon śvietu pa płavańni.
