Uletku 2017 hoda fihurant «spravy hraficistaŭ» Viačasłaŭ Kasinieraŭ raspavioŭ, što ŭ Maładziečnie na jaho napali nieviadomyja. Pa jaho viersii, heta byli prychilniki «pravych» pohladaŭ.
Kasinieraŭ raskazvaŭ, što jaho ź siabrami admysłova šukali: «Niekalki mašyn jeździli pa horadzie».
Kasinieraŭ paśla źbićcia
I voś, milicyja paviedamiła, što tych chulihanaŭ znajšli. Ich było čaćviora: traim pa 20 hadoŭ, adnamu 22. Dvoje z Maładziečna, adzin sa Smarhoni, jašče adzin chłopiec ź Vilejskaha rajona.
Svoj udzieł u bojcy jany paćvierdzili i pryznali vinu.
«Sudom vyśvietlena, što ŭ toj viečar kampanija maładych ludziej zadumała kanflikt ź inšaj kampanijaj. Nie spadabalisia źniešni vyhlad i styl znosin dvuch chłopcaŭ i dźviuch dziaŭčat. Paśla nievialikaha dyjałohu na hetuju temu abvinavačanyja pierajšli da aktyŭnych dziejańniaŭ. Jany źbili svaich vizavi, pryčym dastałasia nie tolki chłopcam, ale i žančynam», — paviedamlajuć milicyjanty.
Pryčym milicyjanty padkreślivajuć — paśla bojki paciarpiełyja aktyŭna raspaviadali pra historyju ŭ ŚMI. A na sudzie pieravažna kazali, što kiepska pamiatajuć padziei taho dnia.
U vyniku ŭsie abvinavačanyja byli pryznany vinavatymi i atrymali pa 3 miesiacy aryštu. Ale ž im zaličyli termin znachodžańnia pad vartaj, pakul išło śledstva.
Takim čynam, troch chulihanaŭ vyzvalili, jašče adzin chłopiec prachodzić taksama pa inšaj spravie (jon asudžany na 4 hady iznoŭ ža za źbićcio).
Sam Viačasłaŭ Kasinieraŭ praciahvaje śćviardžać, što napadnikaŭ było bolš. U źbićci ŭdzielničała jak minimum siem čałaviek, miarkuje jon. A tyja čaćviora prosta trapilisia na kamiery, pajšli na supracoŭnictva sa śledstvam, tamu milicyja, maŭlaŭ, imi i zadavoliłasia.
Ci zadavoleny jon prysudam?
«Na prysud mnie ŭvohule plavać. Nas — paciarpiełych — faktyčna łavili i hvałtoŭna vieźli da śledčych. My vystupajem za toje, kab nam dali mahčymaść abaraniać siabie padčas napadaŭ, a nie pa fakcie źbićcia zmahacca ŭ sudach. Treba, kab źmianili zakony i, naprykład, dali mahčymaść zachoŭvać i vykarystoŭvać traŭmatyčnuju zbroju», — patłumačyŭ Kasinieraŭ.
Taksama jon paraŭnaŭ prysud sa «spravaj antyfašystaŭ» i prysudam Illi Vałaviku i jaho siabram:
«Tut źbićcio ŭ centry horada, jość videazapisy — i 3 miesiacy aryštu. A za sutyčku ŭ tralejbusie — 10 hadoŭ, 6 hadoŭ i dva terminy pa 4 hady adpaviedna».
