Užo nie pieršy hod u Biełarusi prachodzić akcyja «Našy dzieci». Heta dabračynnaje mierapryjemstva, jakoje prachodzić napiaredadni Novaha hoda. Čynoŭniki ŭručajuć dzieciam padarunki (hrošy na hetyja patreby vydzialajucca asobnymi pastanovami) i siadziać ź imi za sałodkimi stałami.
Fiškaj akcyi źjaŭlajecca toje, što ŭdzieł u akcyi «Našy dzieci» prymajuć usie vysokija čynoŭniki, uličvajučy Alaksandra Łukašenku.
Heta redkaja mahčymaść ubačyć čynoŭnikaŭ u niefarmalnaj abstanoŭcy. Časta vizity namienkłatury sparadžajuć dastatkova cikavyja fotazdymki. Kaniečnie, usie hetyja pajezdki supravadžajucca aktyŭnym aśviatleńniem u dziaržaŭnych ŚMI.
Sioleta akcyju «Našy dzieci» adkryŭ premjer-ministr Andrej Kabiakoŭ, jaki pajechaŭ u Maładziečanskuju škołu-internat. Jon pryvioz dla dziaciej interaktyŭnuju multymiedyjnuju došku, spartyŭny invientar i słodyčy.
Jość fatazdymak, dzie za sałodkim stałom siadziać Andrej Kabiakoŭ, namieśnik staršyni Minskaha abłvykankama Ihar Makar, staršynia Maładziečanskaha rajvynkama Alaksandr Jachnaviec i ŭsiaho adzin školnik.
U toj samy dzień ministr pa nadzvyčajnych situacyjach Uładzimir Vaščanka naviedaŭ Čechaŭščynskuju škołu-internat u Vałožynskim rajonie. Heta škoła, padšefnaja MNS. Kursanty Univiersiteta hramadzianskaj abarony zładzili dyskateku.
Pamiežniki zvazili vychavancaŭ Dziaržynskaha rajonnaha sacyjalna-piedahahičnaha centra ŭ cyrk. Razam ź imi ŭ cyrk trapili i dzieci pamiežnikaŭ z usich rehijonaŭ krainy. Na žal, zdymkaŭ kiraŭnika kamiteta Anatola Łapo z rastavymi cackami ci źviarami nie było.
Ministr unutranych spravaŭ Ihar Šunievič byŭ u Radaškovickaj škole-internacie Maładziečanskaha rajona. Hałoŭnamu milicyjanieru pakazali teatralnuju pastanoŭku «Eli i jaje siabry ŭ Zaśniežanaj krainie».
Vice-śpikier Savieta Respubliki Maryjana Ščotkina i byłaja ministr infarmacyi Lilija Ananič pryjazdžali ŭ Ždanovickuju śpiecyjalnuju ahulnaadukacyjnuju škołu-internat. Paviedamlajecca, što padarunki atrymali nie tolki dzieci, ale i sama Ščotkina ad dziaciej.
Ministr sportu i turyzmu Alaksandr Šamko ŭručyŭ ček na 3000 rubloŭ Ivianieckamu domu-internatu dla invalidaŭ.
Kiraŭnik ministerstva abarony Andrej Raŭkoŭ naviedaŭ Andrejeŭski dziciačy dom u Aršanskim rajonie. Siłaviki pryvieźli ŭ dziciačy dom novyja łožki. Taksama ministr skazaŭ, što prapracoŭvajecca varyjant naviedvańnia vychavancami «Linii Stalina».
Staršynia Śledčaha kamiteta Ivan Naskievič pryvioz padarunki dla pacyjentaŭ 3-j haradskoj dziciačaj kliničnaj balnicy.
