Lidar Abjadnanaj hramadzianskaj partyi Anatol Labiedźka ŭ žyvym efiry ŭ fejsbuku vykazaŭsia pa aktualnych palityčnych pytańniach. U pryvatnaści, jon adkazaŭ kiraŭniku «Havary praŭdu» Andreju Dźmitryjevu i pamočniku deputatki Hanny Kanapackaj Dzianisu Cichanienku.
«Kali vy adkryjecie staronku Hanny Kanapackaj, to tam hałoŭnaj navinoj jaki ŭžo miesiac staić infarmacyja ab stvareńni kampanii «Napierad, Biełaruś!». Hałoŭnaja ideja kampanii — pryciahnieńnie novych ludziej u palityku. Hučyć pryhoža, navat vysakarodna. Ale kali vy zajavili pra novych ludziej, to zajmajciesia imi, niasicie adkaznaść za ich. Heta nie biazdomnaje kaciania, jakoje možna ŭziać, a nazaŭtra vykinuć nazad», — vobrazna kaža Labiedźka.
Hanna Kanapackaja źjaŭlajecca siabram AHP, u 2016 hodzie jana była abranaja deputatam Pałaty pradstaŭnikoŭ.
«Ludziam, jakich pazvali Kanapackaja i Cichanienka, patrebnaja realnaja dapamoha. Dapamažycie hetym ludziam, nie kidajcie ich. Lohka pryjechać u niejki rehijon, zrabić sełfi i źjechać. Piać chvilin času. Dapamahčy hetym ludziam, sabrać podpisy, pakazać — heta vializnaja praca. Kali ŭ lutym dobryja kampanii praviaduć novyja ludzi, to heta budzie realnaja sprava, a nie papulizm», — skazaŭ staršynia AHP.
Jašče mienš dypłamatyčnym Labiedźka byŭ, kali pačaŭ vykazvacca pa asobie Andreja Dźmitryjeva. Jon staŭ razvažać na temu adroźnieńniaŭ pamiž AHP i «Havary praŭdu».
«Adroźnieńni pamiž «Havary praŭdu» i AHP farmulujecca ŭsio vielmi prosta: «Havary praŭdu» imkniecca intehravacca ŭ isnujučuju sistemu, a AHP stavić zadaču źmianić sistemu.
U AHP nie paźbiahajuć vostrych pytańniaŭ, u «Havary praŭdu» nikoli nie krytykujuć Łukašenku. Jość kiepskija bajary, a car — cudoŭny. Kali zdarajucca trahiedyi, jak u Piečach, to vinavaty dla «HP» — pres-sakratar Minabarony, a dla nas — hałoŭnakamandujučy i ministr abarony», — adnačyŭ Labiedźka.
«Dla nas palityčnyja pytańni takija samyja aktualnyja, jak ekanamičnyja. My zajmajemsia nie tolki łavačkami, darohami, dachami, ale i hłabalnymi pytańniami, jak prava vybaru. Tak, my kateharyčna suprać taho, kab mižnarodnaja supolnaść dapamahała biełaruskaj dziaržavie šlacham hrantaŭ. 300 tysiač jeŭra na sudovuju sistemu. Kaho hetkim čynam my padtrymlivajem?
Dźmitryjeŭ kaža, što jany niedzie pa centry. Tady hety centr dzieści na krajnim bierazie pobač z ŁDPB. I pa ŭzroŭni samacenzury, i pa adnosinach da ŭłady, i pa žadańni ŭbudavacca ŭ hetuju sistemu, jany vielmi blizkija», — rezka adreahavaŭ Labiedźka.
***
Na telehram-kanał «Našaj Nivy» možna padpisacca tut.
