Haahski trybunał pa vajennych złačynstvach u byłoj Juhasłavii prysudziŭ byłoha hienierała armii baśnijskich sierbaŭ Ratka Mładziča da pažyćciovaha źniavoleńnia, pryznaŭšy jaho vinavatym u hienacydzie i złačynstvach suprać čałaviečnaści.
Ratka Mładzič u hady vajny ŭ byłoj Juhasłavii ŭ pieršaj pałovie 1990-ch kamandavaŭ armijaj baśnijskich sierbaŭ i, na dumku trybunała, vinavaty ŭ zabojstvie tysiač mirnych žycharoŭ Bośnii i Hiercahaviny.
Hałoŭnaje sa złačynstvaŭ, učynienych pa zahadzie Ratka Mładziča — raźnia ŭ Srebranicy, dzie ŭ 1995 hodzie byli zabityja bolš za siem tysiač musulman, mužčyn i chłopčykaŭ.
«Pałata (častka trybunała) pryjšła da vysnovy, što suprać baśnijskich musulman u Srebranicy byli ździejśnienyja złačynstvy, jakija kvalifikujucca jak hienacyd, pieraśledu, źniščeńnie i hvałtoŭnaje pierasoŭvańnie», - skazaŭ, začytvajučy prysud, staršynia Mižnarodnaha trybunała AAN pa byłoj Juhasłavii (MTBIU), sudździa ź Niderłandaŭ Alfons Oryje.
Žančyna z Bośnii radujecca prysudu Mładziču ŭ Haazie, AP
Mładziča taksama abvinavačvajuć u złačynstvach, jakija ździejśnili vajennyja farmiravańni sierbaŭ pad jaho kamandavańniem, jakija asadžali Sarajeva. Abłoha praciahvałasia kala troch z pałovaj hadoŭ, za hety čas u horadzie zahinuli bolš za 10 tysiač čałaviek.
Sudździa Alfons Oryje skazaŭ u sieradu ŭ sudzie, što Mładzič asabista kamandavaŭ artyleryjaj, abstrelvali žyłyja rajony Sarajeva, pakazvajučy, kudy stralać.
Na pačatku pasiadžeńnia Oryje nahadaŭ, što Ratka Mładzič abvinavačvaŭsia pa adzinaccaci epizodach, u tym liku pa dvuch epizodach hienacydu i piaci epizodach, jakija abvinavačvańnie kvalifikavała jak złačynstvy suprać čałaviečnaści. Usie hetyja złačynstvy byli ździejśnienyja z maja 1992 pa listapad 1995 hoda
U śniežni minułaha hoda prakuror paprasiŭ pakarać Mładziča da pažyćciovaha źniavoleńnia.
Reuters.com
Były hienierał, jakomu zaraz 75 hadoŭ, chavaŭsia ad mižnarodnaha trybunała na praciahu 16 hadoŭ. Jon byŭ aryštavany ŭ mai 2011 hoda ŭ vyniku apieracyi sierbskich śpiecsłužbaŭ i adpraŭleny dla suda ŭ Haahu.
Mładzič adchilaje ŭsie abvinavačvańni ŭ svoj adras.
U sakaviku hetaha hoda mižnarodny trybunał pa byłoj Juhasłavii prysudziŭ eks-lidara baśnijskich sierbaŭ Radavana Karadžyča da 40 hadoŭ turmy za hienacyd i vajennyja złačynstvy padčas vajny ŭ Bośnii ŭ 1992-95 hadach.
Ratka Mładzič — apošniaja sa znakavych fihur, jakija apynulisia na łavie padsudnych pierad Haahskim trybunałam. U bližejšyja miesiacy hety stvorany AAN śpiecyjalny sud pavinien spynicca na hetym.
