1. Inžynier-robatatechnik
Inžyniernyja śpiecyjalnaści buduć najbolš zapatrabavanymi ŭ budučyni. Čym bolš pracaŭnikoŭ zavodaŭ zamianiajuć robaty, tym bolš treba ludziej, jakija buduć ich absłuhoŭvać: prahramavać, ramantavać, uklučać i vyklučać, čyścić, kantralavać.
Dobry śpiecyjalist-robatatechnik maje daskanała raźbiracca ŭ aŭtamatyzavanych sistemach, prahramavańni, kiravańni pracesami, mieć vydatnyja viedy ŭ halinie fiziki, elektratechniki, miechaniki.
Vielmi vialiki plus robataŭ zaklučajecca navat nie ŭ spraščeńni žyćcia ludziej, a ŭ tym, što jany zmohuć zamianić ludziej na samych niebiaśpiečnych pracach — u šachtach, pry praviadzieńni padvodnych i budaŭničych rabot, na vajnie. Usio heta pamienšyć kolkaść śmierciaŭ padčas pracy.
2. Śpiecyjalist pa virtualnaj realnaści
Šmat chto ličyć, što takija hadžety, jak telefony, płanšety, noŭtbuki ŭžo nie majuć patencyjału dla raźvićcia. Usio, što prapanujuć nam bujnyja vytvorcy — bolš jarkija ekrany, macniejšaje škło, adsutnaść abo najaŭnaść peŭnych knopak, funkcyj i h.d. Ale heta nie revalucyja, jakaja zdolnaja paviarnuć chod historyi, jak toje zrabili, naprykład, sensarnyja ekrany. Što ž dalej?
Najbujniejšyja transnacyjanalnyja karparacyi, takija jak Google, Apple, Samsung i inšyja, robiać staŭku na dapoŭnienuju i virtualnuju realnaść. Raźvićcio mienavita hetych technałohij jany bačać u jakaści asnoŭnaj krynicy prybytkaŭ u budučyni.
Čytajcie taksama: Virtualnaja i dapoŭnienaja realnaść: što heta i ŭ čym adroźnieńnie?
3. Raspracoŭščyk bieśpiłotnych sistem
Kiroŭcy, paštaljony, kurjery, lotčyki — heta ŭsio tyja prafiesii, jakija ŭžo zaraz pačynajuć zamianiacca bieśpiłotnymi aparatami: kvadrakoptarami, bieśpiłotnymi aŭtamabilami i samalotami. Bujnyja internet-kramy Alibaba dy Amazon užo ekśpierymientujuć z pavietranaj dastaŭkaj tavaraŭ dronami.
Asabliva zapatrabavanymi bližejšym časam stanuć śpiecyjalisty pa prajektavańni bieśpiłotnych aŭtamabilaŭ: jany ŭžo nie prosta testujucca, a nasamreč prysutničajuć na darohach, i z kožnym hodam ich stanovicca ŭsio bolej. Prafiesija raspracoŭščyka bieśpiłotnych sistem pa składanaści padobnaja da aŭtamabilebudavańnia. Ale, akramia hłybokich inžyniernych viedaŭ, śpiecyjalistu treba vydatna raźbiracca ŭ prahramavańni i architektury sistem kiravańnia.
4. Śpiecyjalist pa pierapracoŭcy adkidaŭ
Zaraz pieradavyja krainy aktyŭna zajmajucca pierapracoŭkaj druhasnych materyjałaŭ dla paŭtornaha vykarystańnia. Niekatoryja ź ich navat kuplajuć śmiećcie ŭ tych susiedziaŭ, jakija nie majuć ułasnych sistem pierapracoŭki, bo heta vyhadna.
U budučyni rašeńnie ekałahičnych prablem stanie hałoŭnaj umovaj ustojlivaha raźvićcia. Tamu ekołahi, jakija śpiecyjalizujucca na recyklinhu — pierapracoŭcy adkidaŭ, — buduć zapatrabavanyja va ŭsich halinach vytvorčaści i transpartu. A pytańni abarony navakolnaha asiarodździa buduć vyrašać taksama pry dapamozie vysokatechnałahičnych instrumientaŭ, dla jakich, znoŭ ža, patrebnyja inžyniery.
5. Fud-inžynier (charčovy inžynier)
Zadačaj charčovaj inžynieryi budučaha stanie stvareńnie vialikaje kolkaści białkoŭ i vuhlavodaŭ na nievialikaj płoščy ziamli i pry minimalnych enierhazatratach — kab prakarmić nasielnictva płaniety, jakoje imkliva raście.
Fud-inžyniery pavinny buduć stvarać novyja pradukty z tannaj i ahulnadastupnaj syraviny: z raślin, bahavińnia i navat adkidaŭ.
Vielmi aktualnym źjaŭlajecca pytańnie pašyreńnia ŭžyvańnia štučnaha miasa, a taksama źnižeńnia koštu jaho vytvorčaści. Naprykład, u łabaratoryi Impossible Foods u ZŠA prydumali, jak z raślinnych praduktaŭ atrymać paŭnavartasny zamianialnik miasa — nie tolki ŭ płanie charčovaj vartaści, ale i pa smaku i tekstury.
Čytajcie: Jak hienietyki stvarajuć štučnaje miasa, što nie adroźnić ad sapraŭdnaha
