Niekalki rasijskich łyžnikaŭ rašeńniem kamisii MAK pryznali vinavatymi ŭ parušeńni antydopinhavych praviłaŭ.
Siarod dyskvalifikavanych Maksim Vylahžanin. Jon finišavaŭ na druhim miescy ŭ honcy na 50 kiłamietraŭ. Pieršaje miesca było ŭ Alaksandra Lahkova, adnak jaho pazbavili miedala za dopinh jašče raniej.
Ciapier alimpijskim čempijonam stanie jašče adzin rasijanin — Illa Čarnavusaŭ, — jaki pakazaŭ u marafonie treci vynik. Srebra dastaniecca Marcinu Jonsrudu Sundbiu (Narviehija), a voś bronza — Siarhieju Dalidoviču, jaki ŭ lutym 2014 hoda finišavaŭ piatym.
«Šmat chto prosić prakamientavać adchileńnie rasijskich łyžnikaŭ — biez kamientaroŭ. Ale kali sustrenusia ź imi, ruku pacisnu. Pavažaju!» — napisaŭ u fejsbuku Siarhiej Dalidovič.
Darečy dla Siarhieja Dalidoviča heta budzie pieršy alimpijski miedal uvohule.
***
Nahadajem, što 44-hadovy Siarhiej Dalidovič uletku sabraŭ 100% nieabchodnaj sumy (30 tys. rubloŭ) dla ŭdziełu ŭ Alimpijady-2018 u Paŭdniovaj Karei. Dla spartoŭca heta buduć siomyja Hulni, u alimpijadach jon biare ŭdzieł ad 1994 hoda.
Ale za niekalki miesiacaŭ da Alimpijady Siarhiej daznaŭsia, što nie maje mahčymaści treniravacca z nacyjanalnaj zbornaj. «U niejki momant niechta paličyŭ, što Dalidovič zanadta stary dla taho, kab zastavacca najlepšym łyžnikam Biełarusi. Mnie zdajecca, heta niespraviadliva, kali maja hałoŭnaja vina — uzrost. Hatovy dakazać na łyžni, što mienavita ja varty pradstaŭlać krainu na Alimpijadzie 2018», — napisaŭ tady łyžnik, abviaściŭšy zbor hrošaj. Nieabchodnyja 30 tysiač Siarhiej sabraŭ za niekalki tydniaŭ.
Takim čynam, na Alimpijadzie-2014 u biełarusaŭ siem miedaloŭ: piać załatych (Domračava — 3, Kušnir, Cupier) i dva bronzavyja (Skardzina, Dalidovič).
