Navukoŭcy miarkujuć, što ŭ Biełaruś viarnuŭsia lasny kot — dzikaja žyvioła, jakaja doŭhi čas ličyłasia vymierłaj, paviedamlaje partał Wildlife.by. Apošniuju takuju žyviolinu zdabyli ŭ 1927 hodzie ŭ Barysaŭskim rajonie.
Ilustracyjny zdymak. Fota masterok.livejournal.com
Lasny kot adroźnivajecca ad chatniaha surodziča bujnymi pamierami i nieludzimaściu. Jaho daŭžynia cieła składaje 50—75 sm, daŭžynia chvosta — 21—35 sm. Darosły lasny kot važyć 3—8 kh. Na ŭnutranym baku łap dobra vidać čornyja plamy. A voś chvost šyroki i tupy, z vyraznymi čornymi pałoskami.
Lasny kot, jak miarkujecca, trapiŭ u fotapastku ŭ Paleskim dziaržaŭnym radyjacyjna-ekałahičnym zapaviedniku. Nadzvyčaj padobnuju istotu sfatahrafavali ŭ byłoj vioscy Rožava ŭ Naraŭlanskim rajonie — heta zona, adsielenaja paśla Čarnobylu.
Lasnyja katy, raspaŭsiudžanyja ŭ Karpatach, apošnim časam pašyrajuć areał na ŭschod, až da levabiarežža Dniapra. Imavierna, hety ruch lasnoha kata zakranuŭ i Biełaruś.
***
Na telehram-kanał «Našaj Nivy» možna padpisacca tut.
