Ispanski ŭrad pazbaviŭ Katałoniju aŭtanomii i pryznačyŭ novym kiraŭnikom rehijona vice-premjera Saraju Sajens de Santamaryja, paviedamiła Bi-bi-si.
Parłamient Katałonii ŭ piatnicu prahałasavaŭ za vychad sa składu Ispanii, uchvaliŭšy adpaviednuju dekłaracyju.
Adrazu paśla hetaha ispanski sienat uvioŭ u aŭtanomii naŭprostavaje kiravańnie z Madryda, a śledam urad Ispanii abviaściŭ pra rospusk katałonskaha parłamienta i pryznačyŭ novyja vybary na 21 śniežnia.
Premjer krainy Maryjana Rachoj abviaściŭ ab źniaćci z pasady kiraŭnika ŭrada Katałonii Karłasa Pučdemona i paabiacaŭ dabicca pryznańnia katałonskaj dekłaracyi niezaležnaści niezakonnaj.
Pazbavilisia svaich pasad ŭsie členy katałonskaha ŭrada, a taksama mnohija inšyja čynoŭniki, u liku jakich kiraŭnik palicyi Katałonii - Žuzep Łuis Trapera.
Trapera ličyŭsia sajuźnikam lidaraŭ Katałonii, jakija vystupali za adździaleńnie rehijona. Madryd abvinavačvaje jaho ŭ miaciažy z-za nievykanańnia abaviazkaŭ pa achovie supracoŭnikaŭ nacyjanalnaj palicyi Ispanii ad udzielnikaŭ pratestaŭ pierad refierendumam ab niezaležnaści.
Demanstracyi za i suprać adździaleńnia Katałonii praciahvalisia da nočy. Čakajecca, što novyja akcyi projduć u subotu, u Madrydzie zapłanavanaja demanstracyja «u abaronu adzinstva Ispanii i Kanstytucyi».
Pra niepryznańnie adździaleńnia rehijonu vykazalisia lidary bolšaści viadučych krain śvietu. Dziaržaŭny departamient ZŠA zajaviŭ, što Katałonija źjaŭlajecca nieadjemnaj častkaj Ispanii.
Maštabny palityčny kryzis u Ispanii pačaŭsia, paśla taho jak katałonskija lidary 1 kastryčnika, nasupierak rašeńniu Kanstytucyjnaha suda, praviali refierendum ab niezaležnaści.
Urad Katałonii śćviardžaŭ, što pry jaŭcy ŭ 43% za niezaležnaść prahałasavali 90,18% udzielnikaŭ, suprać - 7,83%. Jašče 1,98% tych, chto pryjšoŭ na ŭčastki kinuli ŭ skrynki pustyja biuleteni.