Rasčaravanyja karupcyjaj u palityčnych siłach, hramadskija aktyvisty chočuć stvaryć ułasny vybarčy śpis. Niepartyjnym kandydatam u prezidenty moža stać 42-hadovy śpiavak Śviatasłaŭ Vakarčuk.
Nastupnyja prezidenckija i parłamienckija vybary va Ukrainie mohuć stać niezvyčajnymi. Hramadzianskaja supolnaść krainy ŭpieršyniu moža padtrymać nie kandydata adnoj z palityčnych sił, a pravieści ŭłasnuju vybarčuju kampaniju.
U 2004 hodzie niedziaržaŭnyja arhanizacyi aktyŭna stajali za Viktara Juščanku. U 2010 hodzie prajeŭrapiejskija siły byli raskołatyja miž niekalkimi kandydatami, a pieramoh Viktar Janukovič. U 2014 hodzie kampramisnym kandydatam akazaŭsia Piatro Parašenka. Hramadstva spadziavałasia, što jahonyja zdolnaści pieramoŭnika mohuć dapamahčy ŭ kryzisnaj situacyi kanfliktu na ŭschodzie i poŭdni.
U vyniku ŭkrainskaja dziaržaŭnaść vytrymała vyprabavańnie rasijskaj interviencyjaj. Ale ekanomiku krainy pa-raniejšamu kantraluje vuzkaje koła miljarderaŭ i multymiljanieraŭ. Dziaržaŭny biudžet mały, bo ludzi na ŭsich uzroŭniach stracili refleks sumlennaj spłaty padatkaŭ, a dachody dziaržaŭnych i niedziaržaŭnych kampanij masava sychodziać u afšory. U toj ža čas karupcyja źjadaje navat toje małoje, čym dziaržava moža rasparadžacca. Čynoŭniki, sudździ, deputaty vałodajuć majomaściu i jeździać na mašynach, košt jakich našmat pieraŭzychodzić lehalnyja dachody, — heta stała va Ukrainie normaj, jakoj nichto nie dzivujecca.
Na vybarach 2014 hoda papularnyja hramadskija dziejačy padtrymali roznyja palityčnyja siły. Žurnalisty-rasśledavacieli Siarhiej Leščanka i Mustafa Najem, a taksama stvaralnica ruchu «Sumlenna» Śviatłana Zališčuk byli abranyja ŭ deputaty ad Błoka Piatra Parašenki. A jašče adna lidarka «Hramadskaha siektara Jeŭramajdanu» Hanna Hapko prajšła ŭ parłamient ad «Samaabarony».
«Usie my rasčaravalisia ŭ mahčymaści ŭpłyvu znutry isnych palityčnych siłaŭ i chočam na nastupnyja vybary stvaryć novuju, asobnuju palityčnuju mašynu na asnovie kaalicyi hramadskich arhanizacyj», — raskazała «Našaj Nivie» kiraŭnica adnoj z hramadskich arhanizacyj Ukrainy.
Sacyjołahi adznačajuć rasčaravańnie ŭkraincaŭ u palityčnych partyjach i palitykach. Rejtynh Piatra Parašenki ŭpaŭ amal da 10%. Julija Cimašenka apiaredžvaje jaho nienašmat. «Śmiećcievy kałaps» padarvaŭ davier i da mera Lvova Andreja Sadovaha. U toj ža čas paśla akupacyi Kryma i Danbasa «prajeŭrapiejski viektar» va Ukrainie ćviorda pieravažaje prarasijski. Mnohija ŭkrainskija vybarcy hatovyja padtrymać «novy tvar».
Niekalki surazmoŭcaŭ «Našaj Nivy» skazali, što takim moža stać salist hurtu «Okiean Jelzi» Śviatasłaŭ Vakarčuk.
Śviatasłaŭ — śpievaka časta nazyvajuć paprostu «Słaŭko» — naradziŭsia ŭ siamji navukoŭca-fizika. Svoj hurt «Okiean Jelzi» jon ź siabrami stvaryŭ u 1994 hodzie, 19-hadovym. U 1998 jany pierabralisia ź Lvova ŭ Kijeŭ. Da pačatku 2000-ch Vakarčuk staŭ adnym z samych papularnych śpievakoŭ Ukrainy. Jahonyja pieśni «Ja nie zdamsia biez boju», «Vidpusti» («Adpuści») stali chitami. Jon atrymaŭ zvańnie zasłužanaha artysta Ukrainy. Mała chto viedaje, što Vakarčuk pry hetym jašče i kandydat fizika-matematyčnych navuk, jaki napisaŭ dysiertacyju pra supiersimietryju elektronaŭ u mahnitnym poli (pa-ŭkrainsku, darečy).
Akramia ŭkrainskaj, Vakarčuk svabodna havoryć pa-anhlijsku (pabyvaŭ za akijanam jašče školnikam pa adukacyjnym abmienie) i pa-rasiejsku.
U Vakarčuka jość i palityčny dośvied. U 2007—2008 hadach jon byŭ deputatam Viarchoŭnaj Rady ad «Našaj Ukrainy». (Paśla jamu nadakučyła hryźnia ŭnutry demakratyčnaj kaalicyi, i jon skłaŭ mandat.) Akramia taho, viedami ź im dzialiŭsia jahony baćka — doŭhačasovy rektar Lvoŭskaha ŭniviersiteta i ministr adukacyi.
Vakarčuk zaŭsiody byŭ hramadska aktyŭnym. Jon udzielničaŭ u Aranžavaj revalucyi i Jeŭramajdanie. Kali Rasija ŭ 2014 hodzie šturchała nasielnictva poŭdnia i ŭschodu Ukrainy da adździaleńnia i stvareńnia Navarosii, «Akijan Elzy» niastomna vystupaŭ z kancertami na poŭdni, niahledziačy na ryzyki.
Vakarčuk prademanstravaŭ hatoŭnaść pajści ŭ «vyšejšuju palityku», kali ŭ 2017 hodzie pryniaŭ prapanovu Stenfardskaha ŭniviersiteta ZŠA pravieści 10 miesiacaŭ u ich, vučačysia i adnačasova vykładajučy ŭ Centry demakratyi i viaršenstva prava.
Takim čynam, nastupnyja vybary va Ukrainie mohuć stać pieršymi, na jakich vodapadzieł budzie prachodzić nie pa linii «zachad-uschod» i nie pa pytańni hieapalityčnaha vybaru. I prezidenckija, i parłamienckija vybary va Ukrainie majuć adbycca ŭ 2019 hodzie.
