Novym ministram kultury pryznačany 44-hadovy kiraŭnik BDUKM Juryj Bondar. Jon zamianiŭ Barysa Śviatłova, jaki zajmaŭ pasadu 5 hadoŭ.
Juryj Bondar.
Kulturołah-juryst-palitołah
Bondar uznačalvaŭ univiersitet kultury i mastactvaŭ z 2013 hoda (pracavaŭ tam z 2001, vykładaŭ kulturałohiju), ale pa adukacyi jon juryst. Bondar skončyŭ u 1997 hodu jurydyčny fakultet BDU pa śpiecyjalnaści «pravaznaŭstva». Akramia taho, novy ministr kultury — kandydat palityčnych navuk.
U Akademii kiravańnia pry prezidencie jon abaraniŭ dysiertacyju «Instytucyjanalizacyja palityčnaj navuki ŭ pierachodnym hramadstvie (sistemny analiz vopytu Biełarusi i Rasii)».
Razam sa svaim baćkam — Paŭłam Bondaram — vypuścili ŭ «Biełaruskaj encykłapiedyi» padručnik «Palitałohija. Navuka ab palitycy» na rasiejskaj movie.
Deputat Minharsavieta
Bondar — deputat Minskaha haradskoha savieta. Jon sieŭ u deputackaje kresła ŭ 2014 hodzie. Bałatavaŭsia pa Čyhunačnaj akruzie, abyjšoŭšy traich apanientaŭ: ipešnika, pradstaŭnika kamunistyčnaj partyi i kamunalščyka.
Taksama možna daviedacca, što ŭ Bondara ŭ majomaści tolki lehkavoje aŭto — kvatery niama. Jaho hadavy dachod za 2014 hod — amal 274 miljony starych rubloŭ. Heta trochi bolš za $2 tysiačy na miesiac.
Cikava, što padčas pieradvybarčych pikietaŭ Bondar paskardziŭsia ŭ milicyju na pikiet Vitala Rymašeŭskaha. Maŭlaŭ, toj abražaŭ studencka-vykładčyckuju kamandu, jakaja źbirała podpisy ŭ padtrymku svajho rektara-kandydata.
U vyniku na Rymašeŭskaha zaviali administratyŭnuju spravu.
Darečy, u 2016 hodzie Juryj Bondar byŭ kiraŭnikom inicyjatyŭnaj hrupy kandydatki ŭ parłamient i svajoj padnačalenaj — śpiavački Iryny Darafiejevaj.
Słavianin-antyhłabalist
«Da aktyvizacyi maralna-patryjatyčnaha vychavańnia, abnaŭleńnia asobasna-prafiesijnaj padrychtoŭki budučych śpiecyjalistaŭ padachvočvaje i abjektyŭnaja realnaść z takimi prajavami, jak trahičnyja padziei va Ukrainie i inšych dziaržavach; destruktyŭnyja, niepradkazalnyja pracesy ŭ šmatpalarnym śviecie; kryvadušna zakamuflavanaja realizacyja ZŠA i ich satelitami ideałohii hłabalizmu», — piša Bondar u artykule pryśviečanym patryjatyčnamu vychavańniu moładzi, jaki byŭ apublikavany ŭ časopisie «Biełaruskaja dumka».
Akramia taho, ŭ tym ža artykule Bondar nazyvaje vyvučeńnie «zmahańnia savieckaha naroda ŭ Vialikaj Ajčynnaj vajnie» važniejšym srodkam vychavańnia moładzi. I nie zabyvajecca pra bratoŭ-słavianaŭ.
«Varta padkreślić, što ŭ sučasnych umovach nadzvyčaj važna zachavać duchoŭnaje adzinstva brackich słavianskich narodaŭ, farmirujučy ŭ pradstaŭnikoŭ małodšych pakaleńniaŭ pačućcio dačynieńnia da Vialikaj Pieramohi», — piša Bondar.
U inšym artykule Bondar tak acaniŭ padziei va Ukrainie:
«Ciapierašniaja trahiedyja Ukrainy jak raz u tym, što suvierennaja ideałohija ŭkrainskaha naroda była padmienienaja ideałohijaj jeŭraintehracyi. U vyniku zdaryŭsia ahulnanacyjanalny pierałom, jaki pryvioŭ da usieachopnaha kryzisu suvierennaj dziaržaŭnaści».
Piša apaviadańni
Bondar ź siamji vykładčyka BDU — jaho baćka, Pavieł Bondar, kandydat histaryčnych navuk, prafiesar. Baćka i paŭpłyvaŭ na toje, što syn pajšoŭ u jurysty, kazaŭ u adnym ź intervju Juryj Bondar. Ale sam jon vialikaj cikavaści ad prava nie atrymlivaŭ.
«Da mastactva zaŭsiody imknuŭsia: dziciem z entuzijazmam naviedvaŭ roznyja tvorčyja studyi, muzyčnuju škołu. Maja prababula pa matčynaj linii była paśpiachovaj aktrysaj pieciarburhskaha teatra, mahčyma, jaje kachańnie da vysokaha zbolšaha pieradałasia i mnie… Ź vialikim zadavalnieńniem śpiavaŭ u školnym chory, i piedahohi navat pahavorvali, što ja zakapaŭ talent vakalnaha vykanaŭcy. Va univiersitecie aktyŭna vystupaŭ u studenckaj lizie KVZ, a ciapier časam pišu apaviadańni i raduju imi siabroŭ», — raspaviadaŭ Bondar partału minsknews.by.
«Kazanova»
Juryj Bondar — kiraŭnik muzyčnaha prajektu, jaki biełaruski ŭniviersitet kultury zrabiŭ razam z rasiejskim pradziusaram Kimam Brejtburham. Jany pastavili ŭ Minsku miuzikł «Kazanova».
Bondar na premjery «Kazanovy»
Darečy, na premjerny śpiektal chadziŭ Viktar Łukašenka ź siamjoj — kazaŭ, jamu spadabałasia.
