Ministr unutranych spravaŭ Polščy Maryuš Błaščak zajaviŭ, što ŭ novym uzory pašparta, jaki maje źjavicca naleta, nie budzie vyjavaŭ Vostraj bramy ŭ Vilni i mohiłak «arlaniataŭ» u Lvovie, paviedamlaje Radyjo Svaboda.
Błaščak dadaŭ, što jon pryniaŭ takoje rašeńnie «ŭ suviazi z zaŭvahami, jakija pastupali ŭ ministerstva, i paśla atrymańnia rekamiendacyj ad ekśpiertaŭ».
Zamiest vyjavy Vostraj bramy na staronkach pašparta źjavicca nadpis z mahiły Maryi Piłsudskaj (1865—1921), pieršaj žonki maršałka Juzefa Piłsudskaha, pachavanaj na mohiłkach Rosy ŭ Vilni.
Zamiest vyjavy lvoŭskich mohiłak «arlaniataŭ», na jakich pachavanyja polskija abaroncy horada ad ukrainskich i savieckich vojskaŭ u 1918—1921 hadach, u jakaści vadzianoha znaku ŭ pašparcie budzie vyjava małaletniaha Antonija Pietrykieviča (1905—1919), jaki zahinuŭ pry abaronie i paśmiarotna byŭ uhanaravany kryžam «Virtuti Militari».
Na 100-hodździe niezaležnaści Polščy, jakoje budzie adznačacca ŭ 2018 hodzie, ułady pastanavili ŭvieści novyja pašparty. Vyjavy ŭ vyhladzie vadzianych znakaŭ na staronkach dakumienta byli prapanavanyja dla zaćvierdžańnia ŭsim hramadzianam u virtualnym hałasavańni. Prapanova źmiaščeńnia ŭ pašparcie vyjavaŭ Vostraj bramy i mohiłak «arlaniataŭ» u Lvovie vyklikała pratesty i asudžeńnie ŭ Litvie i Ukrainie, u tym liku na ŭzroŭni MZS.
