Sajuz biełaruskich piśmieńnikaŭ, Biełaruski PEN-centr i Zhurtavańnie «Baćkaŭščyna» abviaščajuć pra zasnavańnie litaraturnaj premii za najlepšuju knihu paezii imia Natalli Arsieńnievaj — vybitnaj biełaruskaj paetki, zorki litaratury Zachodniaj Biełarusi, aŭtarki znakavaha vierša «Mahutny Boža». Paśla vajny Arsieńnieva apynułasia ŭ emihracyi, dzie praciahvała zajmacca biełaruskaj spravaj, ŭdzielničała ŭ kulturnaj i aśvietnickaj dziejnaści.
Pieršaja premija budzie ŭručanaja ŭžo sioleta za knihu paezii, napisanuju na biełaruskaj movie i vydadzienuju ŭ 2016 h. Pieramožcu vyznačyć žury, u skład jakoha ŭvachodzić Iryna Bahdanovič, Lavon Barščeŭski, Uładzimir Hłazaŭ, Valžyna Mort, Cichan Čarniakievič.
Litaraturnaja premija imia Natalli Arsieńnievaj zasnavanaja pry spryjańni Fonda kultury i adukacyi Orsa-Ramana i Charytatyŭnaha fonda Zhurtavańnia biełarusaŭ Vialikaj Brytanii.
Pravam naminavańnia na Premiju vałodajuć vydaŭcy, tvorčyja abjadnańni, arhkamitet Premii, siabry žury i sami aŭtary. Na ich lažyć abaviazak pradstavić da 1 kastryčnika na razhlad žury Premii elektronnyja pdf-viersii vydańniaŭ i, kali kniha vydavałasia ŭ papiarovym vyhladzie, dva papiarovyja asobniki knih. Papiarovyja asobniki prymajucca pa adrasie Sajuza biełaruskich piśmieńnikaŭ (Minsk, vuł. Kuźmy Čornaha, 31-906), elektronnyja varyjanty — na adras: [email protected]
Sačyć za abnaŭleńniami možna na staroncy Premii ŭ fejsbuku i na sajtach arhanizataraŭ.
