Jak paviedamlaje insider.pro, Facebook vyjaviŭ kuplu palityzavanaj rekłamy na sumu 100 tys. dalaraŭ na praciahu 2015—2017 hadoŭ ź niepraŭdzivych ulikovych zapisaŭ, jakija mohuć być źviazanyja z Rasijaj, zajaviŭ kiraŭnik słužby biaśpieki sacyjalnaj sietki Aleks Stamos u błohu kampanii: «Pry analizie zakupak rekłamy my vyjavili, što z červienia 2015 hoda pa maj 2017 hoda było vydatkavana kala 100 tys. dalaraŭ na nabyćcio 3 tys. rekłamnych abjaŭ — jany byli źviazany z 470 niesapraŭdnymi akaŭntami i staronkami, jakija parušali našu palityku. Naš analiz taksama pakazaŭ, što hetyja akaŭnty i staronki byli źviazany adzin z adnym i, imavierna, dziejničali z Rasiei».
Bolšaść paviedamleńniaŭ nie tyčyłasia prezidenckich vybaraŭ u ZŠA ci kankretnych kandydataŭ, a ŭtrymlivała pravakacyjnyja kamientary na hramadska-palityčnyja temy, u tym liku ŁHBT, mižrasavyja adnosiny, imihracyja i prava na zbroju. Adznačajecca, što źmiest paviedamleńniaŭ mieŭ varožy charaktar. Akramia taho, Facebook vyjaviŭ 2,2 tys. rekłamnych abjaŭ koštam kala 50 tys. dalaraŭ, jakija taksama mohuć być źviazanyja z palitykaj, ale pry hetym nie parušajuć palityku sacyjalnaj sietki.
Stamos zajaviŭ, što ŭsie vyniki daśledavańniaŭ buduć pieradadzienyja ŭładam ZŠA ŭ ramkach rasśledavańnia roli Rasii ŭ prezidenckich vybarach. Raniej paviedamlałasia, što adnoj z pryčyn pieramohi Donalda Trampa na vybarach u ZŠA stali fejkavyja naviny, u tym liku raźmieščanyja ŭ Facebook. Paśla hetaha kampanija paabiacała zaniacca baraćboj ź niepaćvierdžanym kantentam.
