Alaksandr Alesin, fota Źmitra Łukašuka.
Alesin: «Sami vučeńni, ich pakazalnaja častka, zojmuć nie šmat času - značna bolš času zojmie padrychtoŭka. Treba ŭličvać toj faktar, što prybudzie šmat naziralnikaŭ: z NATO, z susiednich krain, budzie šmat vajskovych śpiecyjalistaŭ, ekśpiertaŭ. Tamu chočuć nie ŭdaryć u brud tvaram - hetym i tłumačycca rańni pryjezd kantynhientu rasijskich vojskaŭ. Raniej ich nazyvali «kvaterjery» - ludzi, jakija zajmalisia uparadkavańniem miescaŭ pražyvańnia, sistem žyćciezabieśpiačeńnia, vajskovaj infrastruktury dla prybyćcia vojskaŭ. Ich ža nielha kinuć na pustoje miesca: treba padrychtavać vajskovyja haradki, namiotavyja łahiery i hetak dalej».
Alesin dadaje, što ŭsie pieraściarohi, što pad prykryćciom vučeńniaŭ Maskva stvaraje ŭ Biełarusi apieratyŭna-stratehičnuju hrupoŭku kolkaściu ad 60 da 100 tysiač vajennasłužačych, rychtuje zachop našaj krainy ci napad na Ukrainu dy krainy Bałtyi, nie majuć pad saboj hleby.
Alesin: «Faktyčna, kožny sałdat, kožnaje padraździaleńnie dastupnyja dla spadarožnikavaj raźviedki. Ešałony na čyhuncy, pahruzka bajavoj techniki - za ŭsim hetym uvažliva sočać z dapamohaj spadarožnikavaj i radyjoelektronnaj raźviedki. I ahienturnaj: amierykanskija i inšyja raźviedčyki pad dypłamatyčnym prykryćciom ci jakim inšym, buduć adsočvać pierasoŭvańnie vojskaŭ i praviadzieńnie vučeńniaŭ.
Zhodna z padlikami, kab pierakinuć u Biełaruś sto tysiač čałaviek, nieabchodna ad 40 da 50 tysiač vahonaŭ. Ciapier na kožnaha vajennasłužačaha nieabchodna srodkaŭ materyjalna-teničnaha i bajavoha zabieśpiačeńnia vahoj u 30 ton. Na adnaho vajennasłužačaha - pałova vahona roznaj vajskovaj majomaści, bajavoj techniki. A ŭjavicie, što budzie, kali 40-50 tysiač vajskovych vahonaŭ pojduć adnačasova ŭ adnym nakirunku - jany pierarvuć uvieś ruch. Dy, i sabrać stolki vahonaŭ chutka i niezaŭvažna nie ŭdasca. Aproč taho, raźmiaścić sto tysiač na terytoryi Biełarusi, zabiaśpiečyć ich usim nieabchodnym, padrychtavać da boju taksama niezaŭvažna niemahčyma. I ŭ nas užo niama adpaviednaj infrastruktury, kab raźmiaścić stolki ludziej».
Niervovaść vakoł vučeńniaŭ stvarajecca štučna, upeŭnieny vajskovy ekśpiert. Nijakaj pahrozy niezaležnaści Biełarusi ci inšych krain u ich niama. Ale šmat chto, jak na Zachadzie, tak i na Uschodzie, admysłova «ŭzdymaje hradus», kab na strachach ludziej zarabić sabie palityčnyja devidenty. I ŭ vyjhryšy ŭsie, aproč Biełarusi, kaža Alesin. Bo vyhladajem jak kraina, na ziamli jakoj Rasija svabodna viadzie svaje vajskova-palityčnyja hulni. Ale admovicca ad praviadzieńnia hetych skandalnych vučeńniaŭ Minsk nie moža, bo hetym mocna razzłuje Kreml.
