Najlepšy futbalist Biełarusi 2016 hoda Cimafiej Kałačoŭ, jaki vystupaje za «Rastoŭ», u haściavym matčy 6-ha tura premjer-lihi čempijanatu Rasii suprać «Ufy» vyznačyŭsia dvuma hałami na praciahu dźviuch chvilin dy harantavaŭ pieramohu svajoj kamandzie.
Sport-Ekspriess
Cimafiej Kałačoŭ vyjšaŭ na zamienu na 63-j chvilinie matča pry liku 1:1, a ŭžo na praciahu dźviuch nastupnych chvilin, z 64-j pa 66-ju, biełarus vyznačyŭsia dźviuma zabitymi miačami. Akramia taho, nieŭzabavie Kałačoŭ adznačyŭsia taksama halavym pasam pry čaćviortym uziaćci varot «Ufy».
Kałačoŭ vyznačajecca ŭ druhim pajadynku zapar. U minułym tury jon prynios pieramohu «Rastovu» ŭ matčy z maskoŭskim «Dynama». Pryčym toj hoł staŭ dla biełarusa pieršym u rasijskaj premjer-lizie za try apošnija hady.
U novym siezonie hałoŭnym trenieram «Rastova» staŭ biełaruski śpiecyjalist Leanid Kučuk.
Atrymaŭšy čaćviortuju pieramohu zapar, «Rastoŭ» zamacavaŭsia ŭ vierchniaj častcy turnirnaj tablicy, z 13 bałami ŭ 6 pajadynkach dahnaŭšy lidaraŭ — picierski «Zienit» i maskoŭski «Łakamatyŭ», u jakich taksama pa 13 bałaŭ, ale paśla 5 hulniaŭ.
Maskoŭski CSKA, jaki ŭznačalvaje Viktar Hančarenka, siońnia vyrvaŭ pieramohu ŭ «Spartaka» 2:1.