Tematyčny park zabaŭ Champions World prapanujuć pabudavać u Biełarusi. Prajekt prezientavany siońnia na mižnarodnym forumie «Letniaja sustreča śpiecyjalistaŭ industryi zabaŭ», pieradaje BIEŁTA.
Disneyland u Kalifornii. Fota avclub.com
U jakaści pierśpiektyŭnaj placoŭki dla jaho raźmiaščeńnia razhladajecca Smalavicki rajon (terytoryja industryjalnaha parku «Vialiki kamień»). Heta budzie šmatfunkcyjanalny turystyčny kompleks usiesiezonnaha aktyŭnaha adpačynku ŭsioj siamji. Tematyka parku — dziciačy sport i alimpijski ruch. Architekturnaja płanirovačnaja kancepcyja parku ŭjaŭlaje ź siabie piać častak śvietu, paznačanych na emblemie alimpijskaha ruchu.
Praduhledžvajecca stvareńnie tematyčnych zon paznavalna-zabaŭlalnaha charaktaru, raźličanych na naviedvalnikaŭ roznych uzrostavych katehoryj. Siarod ich akvapark, placoŭki dla zaniatkaŭ hulniavymi vidami sportu, piejntboła, skiejtynha i parkura, kibiersportu, kartynh-centr, ekstrym-park. Praduhledžany taksama kiempinh, dziciačaja spartyŭnaja vioska, tematyčnyja hateli, restarany i kaviarni. Najaŭnaść takoj raznastajnaści pasłuh, jakija skancentravanyja ŭ adnym miescy, pavinna pryciahnuć značnuju kolkaść turystaŭ u Biełaruś, ličać raspracoŭščyki kancepcyi.
Islands of Adventure u Arłanda. Fota universalorlando.com
Na sustrečy adznačałasia, što zabaŭlalnaja industryja surjozna ŭpłyvaje na turyzm u rehijonie. Tematyčnyja parki ŭ Jeŭropie karystajucca vialikaj papularnaściu. Na sustrečy adznačałasia, što ŭ Minsku dastatkova dobra raźvita parkavaja infrastruktura łandšaftna-špacyrnaha typu, a parkaŭ zabaŭ u horadzie nie tak šmat.
Mižnarodnaja sustreča śpiecyjalistaŭ industryi zabaŭ prachodzić u Minsku 12-14 lipienia. Taki forum prafiesijanałaŭ zabaŭlalnaj industryi pravodzicca štohod užo ŭ šosty raz.
