Akcyja pratestu ŭ Stambule
Sotni tysiač čałaviek uziali ŭdzieł u akcyi pratestu, jakaja prajšła ŭ Stambule ŭ niadzielu, 9 lipienia. Hetaj antyŭradavaj demanstracyjaj zaviaršyŭsia trochtydniovy «Marš spraviadlivaści», arhanizavany apazicyjnaj Narodna-respublikanskaj partyjaj (NRP) u padtrymku jaje aryštavanaha deputata Enisa Bierbierahłu, jakoha prysudzili da 25 hadoŭ turmy za razhałošvańnie dziaržaŭnaj tajamnicy.
Akcyja pratestu stała adnoj z samych bujnych z 2013 hoda, piša hazieta AFP. Pradstaŭniki apazicyi śćviardžajuć, što ŭ stambulskim pratestnym mierapryjemstvie brali ŭdzieł bolš za miljon čałaviek. Pa dadzienych CNN Turk, na miescy praviadzieńnia mitynhu było dysłakavana kala 15 tysiač palicyjantaŭ, adnak pra zatrymańni abo sproby sarvać pratest nie paviedamlałasia.
Da hetaha ŭdzielniki šeścia prajšli kala 420 kiłamietraŭ ad Ankary da Stambuła, dzie da ich dałučylisia miascovyja žychary. U Stambule mitynh prajšoŭ u rajonie Maltepa, dzie ŭtrymlivajecca aryštavany deputat.
Enis Bierbierahłu ŭ červieni byŭ asudžany na 25 hod turmy za razhałošvańnie presie padrabiaznaściaŭ pa spravie pra pieratrus hruzavikoŭ, jakija naležali Nacyjanalnaj raźviedvalnaj arhanizacyi (MIT) i nakiroŭvalisia ŭ Siryju z uzbrajeńniem. Bierbierahłu adchilaje pradjaŭlenyja jamu abvinavačvańni. Prezident Turcyi Redžep Taip Erdahan abvinavačvaje partyju, jakaja arhanizavała marš, u padtrymcy terarystyčnych hrupovak.
