Prezident ZŠA Donald Tramp nazvaŭ samit «Vialikaj dvaccatki», jaki prajšoŭ u Hiermanii, vializnym pośpiecham, niahledziačy na roznahałośsi ZŠA z astatnimi krainami pa pytańni źmieny klimatu, piša VVS.
Reuters
U sumiesnaj zajavie lidary 18 krain i ES aficyjna pryznali rašeńnie ZŠA vyjści z Paryžskaha pahadnieńnia pa klimacie.
Pry hetym jany padkreślili, što astatnija členy «dvaccatki» pa-raniejšamu buduć prytrymlivacca damoŭlenaściaŭ.
U zajavie taksama havorycca, što ZŠA buduć namahacca ciesna supracoŭničać ź inšymi krainami, kab dapamahčy im bolš ekałahičnym i efiektyŭnym sposabam zdabyvać i vykarystoŭvać vykapnievaje paliva.
U Paryžskim pahadnieńni zakładzienyja abmiežavańni vykidaŭ parnikovych hazaŭ z metaj strymać hłabalnaje pavyšeńnie tempieratur.
U kancy pres-kanfierencyi kancler Hiermanii Anhieła Mierkiel, jakaja prymała samit u Hamburhu, zajaviła, što ŭsio jašče škaduje ab pazicyi prezidenta Trampa pa hetym pytańni.
Mierkiel padziakavała astatnim 19 krainam, jakija vystupili suprać pierahladu pahadnieńnia.
Adnak prezident Turcyi Redžep Taip Erdahan paśla zajaviŭ, što ratyfikacyja Paryžskaha pahadnieńnia jaho krainaj znachodzicca ciapier pad pytańniem, bo vychad ź jaho ZŠA stavić pad pahrozu vypłatu kampiensacyj krainam, jakija raźvivajucca.
Erdahan zajaviŭ, što kali Turcyja padpisvała pahadnieńnie, Francyja paabiacała Ankary kampiensacyi za častku vydatkaŭ, źviazanych z vykanańniem umoŭ damovy.
«My skazali, kali tak i budzie, pahadnieńnie projdzie praz parłamient. U advarotnym vypadku jano nie projdzie», — skazaŭ Erdahan na pres-kanfierencyi, adznačyŭšy, što parłamient pakul nie ŭchvaliŭ damovu.
Donald Tramp paźniej napisaŭ u tvitary: «Samit «Vialikaj dvaccatki» staŭ vializnym pośpiecham i byŭ cudoŭna praviedzieny kancleram Anhiełaj Mierkiel. Dziakuj!»
