Ihar Žuk. 2014 hod.
Ihar Žuk pachodziŭ ź Miadzielščyny, a ŭ Horadniu pryjechaŭ paśla skančeńnia aśpirantury Biełaruskaha dziaržaŭnaha ŭniversytetu. Vykładaŭ u Haradzienskim dziaržaŭnym universytecie imia Janki Kupały, napačatku 90-ch uznačalvaŭ novastvorany Fakultet biełaruskaj kultury i filalohii, zajmaŭsia navukovaj dziejnaściu.
«Takija naradžajucca raz na sto hadoŭ, — havoryć prafesar Alaksiej Piatkievič. — Jon byŭ tearetykam, navataram u svajoj halinie, raźvivaŭ u litaraturaznaŭstvie idei strukturalizmu, jakija niekali ŭspychnuli ŭ saviecki čas u Prybałtycy, ale byli zadušanyja. Jaho doktarskaja była strukturalisckaja, navatarskaja ŭ biełaruskim litaraturaznaŭstvie. Jon byŭ pačynalnikam vialikaj škoły litaraturnaj navuki ŭ Biełarusi, ale jon nie paśpieŭ raźviarnuć kryły, chacia niamała zrabiŭ. Vyklučna talenavity i aryhinalny daśledčyk biełaruskaj litaratury. Heta byŭ pierš za ŭsio tearetyk, talenavity tearetyk jakich zaraz tak nie chapaje ŭ našaj litaratury. Usio, što rabiŭ i napisaŭ Ihar Žuk, było vyklučna cikava i redka — heta byŭ vialiki talent».
«Napačatku 90-ch va ŭniversytecie byŭ stvorany Fakultet biełaruskaj kultury i filalohii. Ihar Žuk byŭ pryznačany dekanam, — uzhadvaje vykładčyk Haradzienskaha universytetu Janka Traciak, jaki ŭ svoj čas byŭ studentam Ihara Žuka. — Užo tady stała zrazumieła, što bolš vartaha čałavieka na heta miesca było b ciažka znajści.
Pry jahonym kiraŭnictvie nia tolki studenty paŭsiul razmaŭlali pa-biełarusku, ale navat rabotnicy ŭ harderobie taksama havaryli pa-biełarusku. I nichto nikoha nie prymušaŭ, prosta Ihar Vasiljevič moh stvaryć takuju atmasferu. U im žyła harmonija, mudraść, čałaviečnaść… Heta vialikaja strata dla Haradzienskaha ŭniversyteta, dla biełaruskaj navuki, heta strata cudoŭnaha čałavieka…
U 1998 hodzie vyjšła z druku jahonaja kniha litaraturnych eciudaŭ «Sustrečny ruch». A ŭ manahrafii «Prazaičny tekst: dynamika rytmavaha isnavańnia» raspracavaŭ aryhinalnuju kancepcyju metradynamiki prazaičnaha vykazvańnia i ŭpieršyniu ŭ historyi litaraturaznaŭstva apisaŭ mechanizm atrymańnia z dapamohaj kamputarnaj apracoŭki tekstu metryčnych aŭtarskich etalonaŭ, razhledzieŭ systemu ich dynamičnaha ŭzajemadziejańnia. Adlustravany ŭ ich hetak zvany «rytmičny instynkt» adkryvaje novyja mahčymaści dla analizu asablivaściaŭ mastackaha stylu majstroŭ biełaruskaje prozy — Janki Bryla, Vasila Bykava, Maksima Hareckaha, Ivana Mieleža, Kuźmy Čornaha».
