Uładalnik Telegram Pavieł Duraŭ zajaviŭ, što nie piarečyć suprać uklučeńnia miesiendžara ŭ rejestr raspaŭsiudžvalnikaŭ infarmacyi ŭ Rasii pry ŭmovie, što viedamstva samo voźmie nieabchodnuju infarmacyju z adkrytych krynic, paviedamlaje VVS.
Pa słovach Durava, jon nie suprać rehistracyi miesiendžara, kali havorka idzie tolki «ab piaci identyfikatarach, jakija klijent pavinien paviedamić u Raskamnahlad».
Pry hetym uładalnik Telegram adznačaje, što zapytanyja viedamstvam rehistracyjnyja danyja ab kampanii-vydaŭcy Telegram nie źjaŭlajucca sakretam i «dastupnyja lubomu achvotnamu ŭ adkrytych krynicach».
Duraŭ cytuje kiraŭnika Raskamnahlada Alaksandra Žarava, jaki paviedamiŭ Telegram, što «nijakaj havorki ab tym, što budzie dostup da pierapiski karystalnikaŭ, nie idzie».
Dajučy zhodu na ŭniasieńnie ŭ rejestr, kampanija zychodzić z adpaviednaści praŭdzie zajavy kiraŭnika Raskamnahlada i nie biare na siabie jakich-niebudź dadatkovych abaviazacielstvaŭ, zajaviŭ Duraŭ.
Jon adznačyŭ, što kampanija ŭžo ciapier zajmajecca vydaleńniem publičnych materyjałaŭ, jakija prapahandujuć teraryzm, hvałt i narkotyki, a taksama pieraryvajuć rassyłku spamu i raspaŭsiud dziciačaj parnahrafii, i hatovaja rabić heta i dalej — nie tolki ŭ Rasii, ale i ŭ inšych krainach.
Adnak, padkreśliŭ Duraŭ, vykonvać «antykanstytucyjny i nierealizujemy technična «zakon Jaravoj» i zachoŭvać pierapisku karystalnikaŭ na siervierach u Rasii kampanija admaŭlajecca.
Kiraŭnik Raskamnahlada Alaksandr Žaraŭ u minułuju piatnicu źviarnuŭsia da ŭładalnika Telegram z patrabavańniem pradstavić viedamstvu infarmacyju dla ŭklučeńnia miesiendžara ŭ jaho rejestr u jakaści «arhanizatara raspaŭsiudžvańnia infarmacyi».
Žaraŭ u svaim zvarocie papiaredziŭ pra pahrozu błakavańnia Telegram ŭ Rasii. Duraŭ ličyć, što taki krok ŭdaryć u tym liku pa pradstaŭnikach ułady ŭ Rasii.
Kampanija Telegram raniej paviedamlała, što zachoŭvaje ŭsiu pierapisku karystalnikaŭ, za vyklučeńniem paviedamleńniaŭ u sakretnych čatach, na svaich siervierach, raźmieščanych u roznych krainach śvietu, u tym liku ŭ Łondanie, Sinhapury i San-Francyska. Ahulnaha schovišča danych niama — roznyja sierviery absłuhoŭvajuć klijentaŭ u roznych častkach śvietu.
Zhodna z rasijskim zakanadaŭstvam, «arhanizatar raspaŭsiudžvańnia infarmacyi» ŭ internecie pavinien zabiaśpiečyć zachoŭvańnie na terytoryi Rasii danych ab svaich karystalnikach i ŭsioj infarmacyi, jakoj jany abmieńvajucca, na praciahu šaści miesiacaŭ.
U pačatku maja Raskamnahlad unios u śpis zabaronienych resursaŭ adrasy miesiendžaraŭ BlackBerry, Imo i Line. U pieraliku taksama akazaŭsia aŭdyjovizualny čat Vchat.
Miesiendžary, jakija raniej admovilisia rehistravacca ŭ viedamstvie ŭ statusie raspaŭsiudžvalnikaŭ infarmacyi, byli ŭniesienyja ŭ rejestr zabaronienych sajtaŭ z pamietkaj «Restricting». Heta aznačaje, što ŭ budučyni Raskamnahlad budzie błakavać usie servisnyja IP-adrasy i techničnyja damieny servisaŭ.
U krasaviku 2017 hoda na tych ža padstavach byŭ zabłakavany mabilny dadatak Zello. Servisam-racyjaj niaredka karystalisia aktyvisty, u tym liku dalnabojniki, padčas kaardynacyi pratestnych akcyj.
