29 červienia ŭ 16:00 u sudzie Leninskaha rajona h. Mahilova adbudziecca razhlad spravy ab administracyjnym pravaparušeńni ŭ adnosinach mahiloŭskaha žurnalista Uładzimira Łapceviča. Razhladać spravu budzie sudździa Litvinava.
Žurnalista abvinavačvajuć pa č. 2. art. 22.9 KaAP za niezakonny vyrab pradukcyi ŚMI.
Tolki ŭčora Uładzimir Łapcevič atrymaŭ paviedamleńnie ź Leninskaha RAUS h. Mahilova ab tym, što sprava ab administracyjnym pravaparušeńni nakiravanaja ŭ sud. Takoje chutkaje pryznačeńnie daty razhladu spravy žurnalist źviazvaje z tym, što termin adkaznaści pa adnamu ź inkryminujemych jamu pravaparušeńniaŭ sychodzić 30 červienia.
Nahadajem, što supracoŭniki Leninskaha RAUS Mahilova skłali na Uładzimira Łapceviča 7 asobnych pratakołaŭ za kožny materyjał, jaki byŭ apublikavany ŭ tydnioviku biełarusaŭ Polščy «Niva» za apošnija dva miesiacy.
Mahiloŭskija žurnalisty ličać, što heta administracyjnaja sprava — svojeasablivaja pomsta Łapceviču za jaho aktyŭnuju pazicyju pa praduchileńni parušeńniaŭ zakanadaŭstva ŭ adnosinach da žurnalistaŭ z boku mahiloŭskich čynoŭnikaŭ i supracoŭnikaŭ milicyi.