22-hadovy rasijski kantraktnik Viktar Ahiejeŭ 24 červienia byŭ uziaty ŭ pałon ukrainskimi vajskoŭcami ŭ Łuhanskaj vobłaści Ukrainy.
Ahiejeŭ, jak vynikaje z publikacyi, uvachodziŭ u raźviedhrupu ŭzbrojenych farmavańniaŭ samaabvieščanaj Łuhanskaj narodnaj respubliki (kiravaŭ hrupaj, pa śćviardžeńni ukrainskich vajskoŭcaŭ, «kadravy ruski aficer kapitan Alaksandr Ščarbak»), i byŭ zatrymany ŭ vyniku jaje sutyknieńnia z ukrainskimi vajskoŭcami ŭ rajonie siała Žałabok Słavianasierbskaha rajona.
Hetuju infarmacyju «Bi-bi-si» paćvierdzili krynicy ŭ Minabarony Ukrainy i kamandavańni ŭkrainskaj 93-j asobnaj miechanizavanaj bryhady.
Maci rasijanina Śviatłana Ahiejeva paznała dakumienty svajho syna na fotazdymkach, jakija padali «Bi-bi-si» krynicy. Fatahrafii pašparta i vajennaha bileta Ahiejeva taksama apublikavali ŭkrainskija žurnalisty.
Ahiejeŭ, jak raspaviali jaho byłyja kalehi, u 2015—2016 hadach prachodziŭ terminovuju słužbu ŭ Novačarkasku Rastoŭskaj vobłaści ŭ pałku suviazi. Paśla zvalnieńnia, pa słovach adnaho ź ich, jon «pajšoŭ słužyć na kantrakt u vajskovuju raźviedku».
Pa słovach Śviatłany Ahiejevaj, jon padpisaŭ kantrakt 18 sakavika 2017 hodu; novym miescam słužby staŭ Batajsk Rastoŭskaj vobłaści. Tam raskvataravanaja 22-ja asobnaja hvardziejskaja bryhada śpiecyjalnaha pryznačeńnia HRU.
Jak vyśvietlili žurnalisty, u asabistaj pierapiscy z adnym z byłych tavaryšaŭ pa słužbie Ahiejeŭ prama skazaŭ, što znachodzicca va Ukrainie, paćvierdziŭšy, što jon «kantraktnik» i jamu «płaciać dastatkova». Śviatłana Ahiejeva raskazała, što jaje syn ab mahčymym vykanańni bajavych zadač na terytoryi Ukrainy kazaŭ «zavualavana».
