Kampjutary dziasiatkaŭ arhanizacyj va Ukrainie i Rasii padvierhlisia atacy virusa-šyfravalščyka, padobnaha da WannaCry. Prablema zakranuła i biełaruskich karystalnikaŭ — pakul viadoma ab adzinkavych vypadkach zaražeńniaŭ u našaj krainie, piša Tut.by.
Ukraina i Rasija — sapraŭdnaja epidemija
Virus nazyvajecca Petya.A. Zaražanyja kampjutary niečakana pierazahružajucca, na ekranie źjaŭlajecca paviedamleńnie ab tym, što fajły na ćviordych dyskach zašyfravanyja. Dla ich rasšyfroŭki nibyta patrabujecca adpravić 300 dalaraŭ na adras bitkojn-kašalka.
Dniom 27 červienia stała viadoma, što virus zaraziŭ kampjutary rabotnikaŭ sietak «Ukrenierha» i DPEK — najbujniejšych enierhietyčnych kampanij Ukrainy. Paźniej chakierskaja ataka zakranuła kampjutary ŭ kabiniecie ministraŭ Ukrainy, łahistyčnaj kampanii «Nova Pošta», «Oŝadbankie», «Ukrtielekomie», aeraporcie «Baryspal», kijeŭskim mietrapalitenie, Ukrainskaj čyhuncy i Čarnobylskaj AES.
Paźniej ab «mahutnaj chakierskaj atacy» na svaje sierviery raspaviała rasijskaja «Rośniefť». Taksama zaražeńnie paćvierdzili ŭ rasijskim ofisie kampanii Mondelez, vytvorcy šakaładu Alpen Gold i Milka. Pavodle danych kryminalistyčnaj łabaratoryi Group-IB, ad virusa paciarpieli bolš za 80 kampanij u Rasii i Ukrainie.
vk.com/vedomosti.ru
U Biełarusi — adzinkavyja vypadki
Ataka zakranuła i biełarusaŭ. U hrupie kampanij «ALUTECH» paćvierdzili, što virus zabłakavaŭ usie kampjutary. Pa niepaćvierdžanych danych, taki ž virus zaŭvažyli na ekranie kampjutara AAT «Babrujski mašynabudaŭničy zavod».
Na samim zavodzie raspaviali, što z kampjutarami sapraŭdy jość prablema, ale nie zmahli ŭdakładnić, jakaja mienavita. Pa słovach śpiecyjalista, ciapier na pradpryjemstvie pracujuć nad jaje vyrašeńniem.
«Zvaroty, jakija datyčacca takich zaražeńniaŭ, u naš adras adzinkavyja, — paviedamili ŭ Nacyjanalnym centry reahavańnia na kampjutarnyja incydenty. — Chvali zaražeńnia dadzienym šyfravalščykam na terytoryi našaj krainy my nie nazirajem».
Nahadajem, pa padobnym pryncypie pracavaŭ virus-šyfravalščyk WannaCry, jaki atakavaŭ tysiačy kampjutaraŭ pa ŭsim śviecie ŭ mai 2017 hoda. Maksimum napadaŭ pryjšoŭsia na Rasiju, Ukrainu, Kitaj i Indyju. Ahułam zaražeńni zafiksavali ŭ 150 krainach śvietu. Padčas epidemii WannaCry nie było zafiksavana ni adnaho paćvierdžanaha vypadku zaražeńnia kampjutaraŭ biełarusaŭ.
