Nacyjanalny bank Ukrainy zafiksavaŭ kibierataki na niekalki kredytnych arhanizacyj. Ab chakierskich napadach taksama zajavili ŭ kampanijach «Ukrenierha» i «Kijeŭenierha».
U paviedamleńni rehulatara havorycca, što banki padvierhnulisia «źniešniamu chakierskamu napadu nieviadomym virusam». «U vyniku hetych kibieratak banki adčuvajuć składanaści z absłuhoŭvańniem klijentaŭ i ažyćciaŭleńniem bankaŭskich apieracyj», — paviedamiŭ Nacbank Ukrainy.
Nazvy bankaŭ i padrabiaznaści ataki rehulatar nie ŭdakładniŭ. «Interfaks-Ukraina», u svaju čarhu, paviedamlaje, što siarod paciarpiełych jość dziaržaŭnyja banki.
Ab chakierskaj atacy paviedamili i ŭ kampanijach «Ukrenierha» i «Kijeŭenierha». «Dźvie hadziny tamu vymušanyja byli vyklučyć usie kampjutary, čakajem dazvołu na ŭklučeńnie ad słužby biaśpieki», — skazali ahienctvu ŭ «Kijeŭenierha».
U «Ukrenierha» taksama raspaviali, što sutyknulisia z prablemami ŭ pracy kampjuternych sistem, ale jany nie źjaŭlajucca krytyčnymi.
U svaju čarhu TJ sa spasyłkaj na krynicy paviedamlaje, što kampjutary ŭ «Ukrenierha» i «Kijeŭenierha» zaražanyja virusam-šyfravalščykam, jaki nahadvaje WannaCry. Kampjutary apynulisia zabłakavanymi, raspaviali surazmoŭcy vydańnia, a za adnaŭleńnie dostupu da infarmacyi patrabujuć 300 dalaraŭ u bitkoinach.