Prezidenta Brazilii Mišela Temiera złavili na chabarnictvie. Hienprakuror krainy Radryha Žano ŭpieršyniu ŭ historyi krainy paprasiŭ Viarchoŭny sud krainy pradjavić hałavie krainy abvinavačvańni.
Temier, jak padazraje prakuratura, atrymaŭ hrošy ad kiraŭnika bujnoha miasapierapracoŭčaha pradpryjemstva, zamiašanaha ŭ karupcyjnym skandale.
U dakumiencie za podpisam hienprakurora Žano havorycca, što Temier i jaho były daradca Radryha Roša Łoŭres «padmianili vykanańnie najvažniejšych abaviazkaŭ dziaržsłužačych niezakonnymi dziejańniami, jakija vykonvalisia ŭ ich asabistych intaresach».
U zapycie śćviardžajecca, što z sakavika pa krasavik hetaha hoda prezident «atrymaŭ dla siabie naŭmysna i praz pasiarednika Radryha Rošu Łoŭresa niezakonnyja dabroty ŭ pamiery 500 tysiač reałaŭ (152 tysiačy dołaraŭ), pradastaŭlenyja Žoeśli Miendonsa Batystaj, prezidentam kampanii J & F Investimentos S. A.».
Hetaja kampanija vałodaje JBS S.A. - najbujniejšym pradpryjemstvam miasnoj pramysłovaści ŭ śviecie.
Abvinavačvańni hienprakuratury Brazilii na adras prezidenta krainy pieradadzienyja sudździ Viarchoŭnaha suda, jaki zaraz pavinien vyrašyć, ci moža sprava adpravicca ŭ nižniuju pałatu parłamienta krainy.
Zhodna z brazilskim zakanadaŭstvam, jana pavinna vyrašyć šlacham hałasavańnia, ci dazvolić sudu pačać praces suprać kiraŭnika dziaržavy.
Kali za dazvoł prahałasuje dźvie traciny pałaty, prezidenta adchilać ad pasady na 180 dzion, pakul budzie iści sud
