Da 1 vieraśnia ŭ Minsku płanujecca adnavić ruch tramvajaŭ u napramku čyhunačnaha vakzała. Pra heta, jak pieradajuć «Minsk-Naviny», padčas pramoj linii 24 červienia paviedamiŭ hienieralny dyrektar HP «Minsktrans» Lavoncij Papianok.
Heta adbudziecca, kali budaŭniki mietro na hetym učastku zavieršać kompleks rabot pa ŭźviadzieńni pierasadačnaha vuzła z 3-j na 1-ju liniju padziemki.
— Z našaha boku zatrymki nie budzie, — zapeŭniŭ Papianok. — Da hetaha času zavieršym rekanstrukcyju ŭčastka tramvajnych šlachoŭ na vulicy Čapajeva ad Kazłova da Biaduli. A na vulicach Pieršamajskaj i Uljanaŭskaj ramontnyja bryhady ŭžo pačali pryvodzić rejki ŭ paradak. Hety ŭčastak pakul nie rekanstrujavali, ale nieabchodnyja peŭnyja prafiłaktyčnyja pracy, pakolki jon niekatory čas nie ekspłuatavaŭsia.
A voś pa vulicy Kastryčnickaj tramvai kursiravać nie buduć. Na dumku kiraŭnika «Minsktransa», aŭtobus 127-ha maršruta vyrašyŭ usie prablemy z transpartnym złučeńniem u hetaj častcy horada.
- Hałoŭnaja pryčyna, pa jakoj my pakul nie płanujem adnaŭlać ruch pa Kastryčnickaj, - vielmi drenny stan kamunikacyj: amal usie inžyniernyja sietki tam padlahajuć pierakładcy, - adznačyŭ jon. - Kali b, jak raniej, płanavałasia budaŭnictva tramvajnaj linii ŭ Sierabranku, to rejki tut, viadoma, rekanstrujavali b. A pakul heta nie maje sensu.
Zrešty, da vulicy Babrujskaj tramvajny ruch adnovicca taksama tolki na čas. Paźniej hetuju liniju znoŭ zakryjuć - užo na rekanstrukcyju. Daty pakul nie ŭdakładniajucca. Mierkavana - u pieršaj pałovie nastupnaha hoda.
