Supracoŭniki adździeła kryminalnaha vyšuku Centralnaha RUUS stalicy zatrymali minčuka, jaki z reŭnaści paškodziŭ mašynu novaha kachanaha svajoj žonki, paviedamili ŭ HUUS Minharvykankama.
U milicyju źviarnuŭsia mužčyna, jaki raspavioŭ, što pry nieviadomych abstavinach była paškodžanaja jaho mašyna «Falksvahien Džeta». U chodzie apieratyŭna-vyšukovych mierapryjemstvaŭ było vyjaŭlena, što da hetaha maje dačynieńnie raniej nieadnarazova sudzimy, u tym liku za ŭčynieńnie kradziažu i niezakonny abarot narkotykaŭ minčuk. Takim čynam jon vyrašyŭ adpomścić synu zajaŭnika, jaki ekspłuatuje paškodžany aŭtamabil.
Vyśvietliłasia, što raniej žonka padazravanaha syšła ad jaho da syna zajaŭnika i admaŭlałasia viartacca. Daviedaŭšysia ad znajomych, što žančyna adrazu paśla razvodu źbirajecca vyjści zamuž za svajho kachanaha, minčuk pryjšoŭ na parkoŭku i nažom parezaŭ šyny, a taksama padrapaŭ korpus aŭto.
Ciapier Centralnym rajonnym adździełam Śledčaha kamiteta Biełarusi pa Minsku pa hetym fakcie raspačataja kryminalnaja sprava pa č. 1 art. 218 (naŭmysnaje paškodžańnie čužoj majomaści) KK RB. Mužčynu pahražaje da 2 hadoŭ abmiežavańnia voli.
