Paśla skandalnaha intervju Śviatłany Aleksijevič, jakoje apublikavaŭ «Rehnum», u ataku na biełaruskuju piśmieńnicu pajšli rasijskija prankiery.
Da nobieleŭskaj łaŭreatki dazvanilisia viadomyja prankiery Uładzimir Kuźniacoŭ i Alaksiej Stalaroŭ, bolš viadomyja jak «Vavan i Leksus».
Uładzimir Kuźniacoŭ i Alaksiej Stalaroŭ.
Historyja prankieraŭ — dobry prykład taho, jak rasijskaja dziaržava nabiraje sabie novych sałdataŭ infarmacyjnaj vajny. Kuźniacoŭ i Stalaroŭ pačynali z trolinhu znakamitaściaŭ, a paśla pierajšli na palitykaŭ. Jany «razvodzili» Alaksandra Łukašenku, prezidenta Turcyi Erdahana. Apošnim časam prankiery padajuć sabie jak hramadskich dziejačaŭ, jany reahujuć na «paradak dnia», telefanujučy tym, čyja pazicyja nie supadaje z patrebnaj Rasii, za što Kuźniacova i Stalarova padazrajuć u suviaziach z Kramlom i FSB. Da taho ž, Vavan i Leksus navat mieli svaju pieradaču na telekanale NTV.
Aleksijevič jany paviedamili, što jana nibyta razmaŭlaje ź ministram kultury Ukrainy.
U razmovie piśmieńnica znoŭ vykazałasia ab nieabchodnaści derusifikacyi Ukrainy, padtrymała dekamunizacyju i znos savieckich pomnikaŭ. Na prapanovu źjeździć u zonu ATA Śviatłana Aleksijevič adkazała stanoŭča.
U pryncypie, ničoha asablivaha novaha ci niečakanaha z vusnaŭ piśmieńnicy nie prahučała. Jana hetych svaich pazicyj nikoli nie chavała. Adnak rasijskija ŚMI ŭžo pačali aburacca «žorstkaj ultrapravaj rytorykaj» Aleksijevič.
Sama piśmieńnica paćvierdziła, što joj telefanavali. Ale ž rasijskija ŚMI, jakija ciapier zachaplajucca z nahody pranka, nie paviedamlajuć, što Aleksijevič telefanavali dva razy.
«Spačatku patelefanavali nibyta ad ministra kultury Ukrainy, tak. Ja pavieryła. A paśla nibyta zvaniŭ Dvarkovič [Arkadź Dvarkovič, namieśnik staršyni ŭrada Rasiijskaj Fiederacyi — NN], tam abiacali niejki orden Družby… Ja ŭžo nie pavieryła, spačatku prosta nazirała za hulnioj, a paśla raśśmiajałasia, — raspaviała «Našaj Nivie» Śviatłana Aleksijevič. — Ale ŭ toj razmovie z «ministram kultury» ja ničoha nie skazała takoha, čaho saromiełasia b. Maje pohlady nie mianiajucca.
U Rasii siońnia nie chočuć čuć praŭdu. I hety šlejf u Rasii vakoł mianie — žadańnie adkazać, žadańnie ablić brudam fihuru, jakaja pieraškadžaje. Zvyčajny pryjom».
Ahułam, ckavańnie Aleksijevič u Rasii pačynaje nahadvać kolišnija kampanii pa dyskredytacyi inšych łaŭreataŭ Nobieleŭskich premij, krytyčnych da tahačasnaj ułady: akademika Sacharava, piśmieńnikaŭ Pastarnaka, Sałžanicyna i Brodskaha. U toj ža čas łaŭreaty-simpatyzanty, jak fizik Ałfioraŭ, piśmieńnik Šołachaŭ, žyli sabie spakojna.
