Žychar Bierlina prysudžany da adnaho hoda i dzieviaci miesiacaŭ pazbaŭleńnia voli ŭmoŭna za seksualnuju suviaź z 13-hadovaj dziaŭčynkaj ruskaha pachodžańnia Lizaj. Takoje rašeńnie, paviedamlaje DW, vynies sud bierlinskaha rajona Tyrharten.
Sud padkreśliŭ, što, choć seksualnyja dziejańni adbylisia pavodle ŭzajemnaj dobraj voli, u toj momant achviara jašče nie dasiahnuła «ŭzrostu zhody».
24-hadovy padsudny Iśmiet S. taksama pryznany vinavatym u vyrabie parnahrafii za zapis seksualnaj sceny na telefon.
Sud taksama pryznačyŭ Iśmietu S. štraf u 3000 jeŭra, jaki jon pavinien pieraličyć u fond dapamohi achviaram hvałtu.
Padsudny całkam pryznaŭ svaju vinu, tamu Liza nie davała pakazańni śviedki na pracesie, choć i znachodziłasia ŭ budynku suda.
Pradstaŭniki abvinavačvańnia, suda i sam abvinavačvany ad kamientaroŭ admovilisia. Advakat Lizy taksama admoviŭsia havaryć ź niamieckimi ŚMI, zajaviŭšy, što tyja raniej «ździekavalisia» ź dziaŭčynki.
***
13-hadovaja Liza, dziaŭčynka ź siamji ruskaha pachodžańnia, u studzieni 2016 hoda prapała bolš čym na sutki. Jaje svajaki śćviardžali (sa spasyłkaj na jaje samu), što jaje vykrali i zhvałcili mihranty ź Blizkaha Uschodu; prakuratura paśla pravierki zajaviła, što jana zastałasia na noč u adnaho z-za prablem u škole i nie była zhvałtavanaja.
Sprava Lizy atrymała šyrokuju ahałosku siarod vychadcaŭ z Rasii, a taksama ŭ rasijskich ŚMI. Siužet pra «vykradańni» Lizy źniaŭ, u liku inšych, Pieršy kanał.
Pra spravu Lizy kazaŭ i kiraŭnik MZS RF Siarhiej Łaŭroŭ. Ministr zajaviŭ, što dziaŭčynka była vykradziena, a ŭłady Hiermanii sprabavali heta schavać. Hiermanski MZS tady zajaviŭ, što Łaŭroŭ umiešvajecca va «ŭnutryhiermanskuju dyskusiju pra mihrantaŭ i raspalvaje jaje».
