Užo amal try miesiacy ŭ źniavoleńni znachodzicca 25-hadovy student BNTU Ivan Kavalčuk. Jon, razam ź inšymi abvinavačanymi, prachodzić pa tak zvanaj «spravie patryjotaŭ». Zatrymanych abvinavačvajuć pa artykule 287 Kryminalnaha kodeksa (stvareńnie niezakonnaha ŭzbrojenaha farmavańnia).
Ivan Kavalčuk. Fota svaboda.org.
Student-architektar Ivan Kavalčuk vučyŭsia na apošnim šostym kursie, navat u źniavoleńni jon praciahvaje pracavać nad dypłomam, źviazanym z adnaŭleńniem Miadzielskaha zamka.
«Moj brat Ivanka mocny ducham čałaviek. Niahledziačy na ŭsie abstaviny, jakija z im adbylisia i adbyvajucca apošnim časam, jon nie hublaje čas darma, — raskazvaje «Našaj Nivie» brat Ivana Alaksiej Kavalčuk. — Akramia samarazvićcia (čytańnia knih i vyvučeńnia polskaj movy), jon šmat času pravodzić za napisańniem svajoj dypłomnaj pracy, temaj jakoha źjaŭlajecca adnaŭleńnie i rekanstrukcyja Miadzielskaha zamka. Ivan skončyŭ 6 kurs architekturnaha fakulteta BNTU, zastałasia tolki abarona dypłoma.
Da hetaha času nie zastałosia nijakich vyjavaŭ i malunkaŭ, jak zamak vyhladau raniej, ale na padstavie raniejšych raskopak i daśledavańniaŭ, u jakich Ivan i sam prymaŭ udzieł u vałanciorskaj hrupie, brat zrabiŭ vialikuju pracu.
Na kanfiskavanym noŭtbuku znachodzicca jahonaja praca z 3D-madellu zamka. Kab daviedacca, jak vyhladaŭ zamak, brat šmatrazova źviartaŭsia ŭ archivy Šviecyi, bo mienavita šviedy zrujnavali jaho. Na hetaje jaho natchniŭ i dapamahaŭ siabra Rusłan Šošyn [žurnalist polskaj haziety Rzeczpospolita — «NN»].
Ja z upeŭnienaściu mahu skazać, što heta budzie vialiki ŭniosak u historyju Biełarusi i jaje razvićcio. Asabliva mnie było b pryjemna daviedacca, što ŭ chutkim časie moj syn zmoža daviedacca sa školnaha padručnika, što byŭ Miadzielski zamak i jak jon vyhladaŭ.
Ja vielmi ŭdziačny za dapamohu vydatnamu chłopcu Zmitru Savieljevu, jaki sam raniej navučaŭsia ŭ BNTU i jaki vyklikaŭsia dapamahčy Ivanu z napisańniem jaho pracy.
Kali heta nie ŭnikalny vypadak napisańnia dypłoma, to, peŭna, nie tak šmat było takich vypadkaŭ, a jak hetaje listavańnie adbyvajecca — hladzicie na prykładzie adnaho ź listoŭ.
I našyja ŭłady ličać takich ludziej, jakija pracujuć dla našaj z vami spadčyny, złačyncami».
