Navukoŭcy Stenfardskaha ŭniviersiteta 14 červienia apublikavali dakład, u jakim apisvajuć novy sposab uznaŭleńnia serca paśla infarktu — z dapamohaj užyŭleńnia ŭ jaho bakteryj, jakija vyłučajuć kisłarod u vyniku fotasintezu, piša VVS.
U dakładzie, jaki vyjšaŭ u časopisie Science Advances, havorycca, što pakul vyprabavańni paśpiachova prajšli na łabaratornych pacukach, ale navukoŭcy spadziajucca, što ŭ budučyni mietad udasca ŭžyvać i da ludziej.
Pryčynaj infarktu źjaŭlajecca spynieńnie krovazabieśpiačeńnia sardečnaj myŝcy. U vyniku taho, što kryviany sasud zakuporvajecca, u serca nie pastupaje nieabchodny kisłarod razam z patokam kryvi.
Ale kali mienavita heta — krytyčny momant, to «čamu b nie ŭziać raślinu abo sam miechanizm fotasintezu i prymianić jaho naŭprost da serca?», cytuje vydańnie The Scientist adnaho z aŭtaraŭ daśledavańnia, stenfardskaha prafiesara Džozefa Vu.
Navukoŭcy vykazali zdahadku, što kali ŭžyvić u serca zdolnuju da fotasintezu adnakletačnuju cyjanabakteryju Synechococcus elongatus, to jana dapamoža prybrać vuhlakisły haz i zabiaśpiečyć kletki ciahlic serca kisłarodam i hlukozaj, jakija nieabchodnyja dla mietabalizmu ŭ adsutnaść krovazabieśpiačeńnia.
Mietad vyrašyli aprabavać na žyvym arhaniźmie. Pacukam imitavali infarkt, uviali ŭ ich sardečnyja ciahlicy cyjanabakteryi, paśla čaho nakiravali na serca pramiani śviatła.
Praz 10 chvilin uzrovień kisłarodu ŭ sercach hryzunoŭ akazaŭsia značna vyšejšy, čym u kantrolnaj hrupy i ŭ tych pacukoŭ, kamu ŭviali cyjanabakteryju ŭ sercy, ale nie padviarhali jaho śvietłavomu vypramieńvańniu. Praz 45 chvilin u pieršaj hrupy taksama palepšyłasia skaračalnaść žałudačkaŭ.
Dadzieny mietad zarekamiendavaŭ siabie jak nietaksičny i pakazaŭ, što nie vyklikaje reakcyi ŭ imunnaj sistemy arhanizma. Akramia svajho asnoŭnaha pryznačeńnia, uviadzieńnie Synechococcus elongatus moža dapamahčy padtrymlivać orhany, zachavanyja dla transpłantacyi.
Adnak navukoŭcy zaklikajuć nie śpiašacca z vysnovami — pakul nie viadoma, jak bakteryja budzie ŭspryniataja čałaviečym sercam. Vialiki minus dadzienaha sposabu lačeńnia — heta adkrytaja apieracyja na serca, to bok raskryćcio hrudnoj kletki, što supravadžajecca vialikimi ryzykami.
Navukoŭcy pracujuć nad tym, kab zrabić novy mietad bolš biaśpiečnym, a mienavita, sprabujuć prydumać, jak uvodzić cyjanabakteryju nie naŭprost u serca, a praź vieny, a taksama jak «pravieści» da serca pramiani śviatła praz skuru i kostki, kab paźbiehnuć raśsiakańnia hrudnoj kletki, raspavioŭ Vu The Verge.
