Amierykanski startap Hyperloop One apublikavaŭ śpis patencyjnych jeŭrapiejskich maršrutaŭ dla transpartnaj sietki chutkasnych vakuumnych ciahnikoŭ. Śpis byŭ składzieny na asnovie zajavak, padadzienych na konkurs Global Challenge. Kampanija vybrała 9 prajektaŭ-paŭfinalistaŭ, jakija praściej za ŭsio budzie realizavać z techničnych i ekanamičnych pryčyn.
- Korsika — Sardzinija 451 km
- Estonija — Finlandyja 90 km
- Bierlin — Hamburh — Frankfurt — Miunchien 1991 km
- Polšča 415 km
- Ispanija — Maroka 629 km
- Niderłandy 428 km
- Łondan — Edynburh 666 km
- Livierpul — Hłazha 546 km
- Kardyf — Hłazha 1060 km
Jak adznačaje Engadget, niekatoryja maršruty pierasiakajuć vadajomy, tamu dla ich budaŭnictva daviadziecca kanstrujavać padvodnyja tuneli. Akramia jeŭrapiejskaha maršrutu, jaki budzie pabudavany praź niekalki hadoŭ, Hyperloop One źbirajecca stvaryć sietku vakuumnych ciahnikoŭ i ŭ ZŠA.
U Jeŭropie kankurencyju Hyperloop One moža skłaści hałandskaja kampanija Hardt Global Mobility, jakaja da 2022 hoda płanuje złučyć linijaj vakuumnych ciahnikoŭ Amsterdam i Paryž. Inžyniery ŭžo pačali budaŭnictva testavaha ŭčastku.
Zhodna z kancepcyjaj pradprymalnika Iłana Maska, ciahniki Hyperloop buduć ruchacca pa vakuumnym tuneli z maksimalnaj chutkaściu ŭ 1223 km/h. Sam Mask nie biare ŭdziełu ŭ realizacyi hetaj kancepcyi, ale jaho kampanija SpaceX arhanizoŭvaje konkursy pa stvareńni roznych kampanientaŭ sistemy. Pradprymalnik zajmajecca krychu inšym prajektam — raspracoŭvaje efiektyŭny mietad budaŭnictva šmatuzroŭnievych tunelaŭ dla baraćby z zatorami. Ale Mask zapeŭniŭ, što technałohija zmoža vykarystoŭvacca i dla ciahnikoŭ Hyperloop.
