Žanočaja zbornaja Biełarusi pa valejbole nie prajšła kvalifikacyju da čempijanatu śvietu — 2018, jaki adbudziecca ŭ Japonii. U hrupie z našymi dziaŭčatami hulali taksama Italija, Bielhija, Bośnija, Ispanija i Łatvija.
Biełaruski, atrymaŭšy tolki try pieramohi ŭ piaci hulniach, zaniali treciaje miesca ŭ hrupie. Pucioŭku na čempijanat śvietu zdabyli italjanki.
Admietna, što za zbornuju ŭ hetych adkaznych startach nie hulała 19-hadovaja valejbalistka jekacierynburhskaha kłuba «Urałačka» Hanna Klimiec. Aficyjnaja pryčyna — chvaroba.
Adnak faktyčna ŭ hety samy čas Hanna spačatku znachodziłasia na adpačynku ŭ Turcyi, a potym krasavałasia ŭ rodnych Baranavičach.
Niekatoryja krynicy paviedamlajuć, što Hanna Klimiec moža pryniać prapanovu zbornaj Rasii i pamianiać hramadzianstva. Rasijanki, u adroźnieńni ad biełarusak, vyjšli na suśvietnyja spabornictvy ŭ Japonii.
«Urałačka» — adzin z najmacniejšych kłubaŭ Rasii. Jaho treniruje Mikałaj Karpol, uradženiec Pružanskaha rajona Biełarusi, jaki šmat hadoŭ addaŭ rasijskamu žanočamu valejbołu, a taksama na praciahu hoda ŭznačalvaŭ biełaruskuju zbornuju (2009-2010).
Hanna Klimiec — adzinaja lehijanierka, jakaja hulaje za «Urałačku». U rasijski kłub jana pierabrałasia ŭ 17-hadovym uzroście, da hetaha vystupała za baranavicki «Atłant».