Joel Goodman, LNP
Za čas dabračynnaha kancerta One Love Manchester 4 červienia brytanskaje adździaleńnie Čyrvonaha Kryža i haradskaja rada Mančestera sabrali 2,35 miljona funtaŭ sterlinhaŭ (bolš za try miljony dalaraŭ) u dapamohu paciarpiełym padčas teraktu. Ab hetym paviedamlajecca ŭ tvitary brytanskaha Čyrvonaha Kryža.
Pierad pačatkam šou stała viadoma, što ŭ fond Manchester Emergency Fund pastupiła dzieviać miljonaŭ dalaraŭ. Takim čynam, usiaho było sabrana 12 miljonaŭ.
Atrymanyja srodki pojduć na dapamohu paciarpiełym ad vybuchu, jaki adbyŭsia 22 maja na kancercie Aryjany Hrande. Śpiavačka stała arhanizataram šou One Love Manchester. Akramia jaje, na kancercie vystupili Fareł, Džaścin Bibier, Liam Hałachier, Keci Pery, Majli Sajrus, Robi Uiljams, Coldplay, Black Eyed Peas, Take That i inšyja vykanaŭcy.
Kancert naviedali 50 tysiač čałaviek. Kvitki na One Love Manchester pradavali pa canie ad 69 dalaraŭ, jany byli raskupleny za šeść chvilin. Tyja, chto prysutničaŭ na šou 22 maja mahli pryjści biaspłatna.
***
U noč na 23 maja na stadyjonie «Mančestar Arena» paśla kancertu Aryjany Hrande adbyŭsia vybuch. Bombu padarvaŭ teraryst-śmiarotnik. U vyniku teraktu 22 čałavieki zahinuli, 120 byli paranienyja. Adkaznaść za terakt uziała na siabie hrupoŭka «Isłamskaja dziaržava».
