Šmat narakaniańniaŭ z boku prostych biełarusaŭ i dziejačaŭ kultury vyklikała žadańnie mahiloŭskich uładaŭ zaprasić na haradski kancert u honar Dnia niezaležnaści rasijskich hastraloraŭ — Aleha Hazmanava, Lva Leščanku i Alaksieja Varabjova.
Čytajcie: Na vystup Hazmanava, Leščanki i Varabjova na Dzień Respubliki ŭłady Mahilova patraciać $84 tysiačy
Aproč dyskusijnaści samoha vybaru (rasijskija śpievaki na Dzień Niezaležnaści Biełarusi, u nas svaich niama?) uražvajuć i hanarary zamiežnych artystaŭ, jakija tyja ŭviazuć z saboj.
Tak, Hazmanavu z kišeniaŭ biełaruskich padatkapłatnikaŭ pierapadzie kala $37 tysiač, Leščanku — $29 tysiač, Vierabjovu — bolš za $17 tysiač.
«Naša Niva» zasiarodziłasia na finansavym pytańni i ŭdakładniła ŭ mieniedžaraŭ, kolki kaštujuć vystupy artystaŭ.
My pradstaŭlalisia čynoŭnikam administracyi nievialikaha rasijskaha horada ŭ Lipieckaj vobłaści, čyja adlehłaść ad Maskvy suvymiernaja z adlehłaściu da Mahilova.
Pieršy ž adkaz navioŭ na dumku, što mahilocy pierapłociać.
«Kali dakładnaj daty niama… Nu ŭ siarednim 1,8-2 miljona (rasijskich rubloŭ — «NN»), kali heta vystupleńnie na haradskoj płoščy. Pa dacie — moža być tańniej. Kali tolki piać piesień? Hanarar budzie toj ža samy. My pracujem tak — kali treba hadzinu, to hadzinu. Kali try — to try. Za tyja ž hrošy», — skazaŭ nam arhanizatar kancertaŭ Aleha Hazmanava.
Takim čynam, u pravincyjnym rasijskim horadzie Hazmanaŭ hatovy pravieści kancert na niekalki hadzin trochi mienš, čym za $31 tysiaču.
A ŭ Mahilovie jon praśpiavaje piać piesień za $37 tysiač — niaŭžo daroha z Maskvy i nazad kaštuje niekalki tysiač?
Inšy śpiavak, Leŭ Leščanka, prosić za vystup na płoščy roŭna 25 tysiač jeŭra (pa ciapierašnim kursie $28 tysiač) za 45 chvilin.
«Heta nie ŭsio. Jość jašče pobytavy i techničny rajder. Pobytavy — pryjezd, pražyvańnie i charčavańnie hrupy, Ich tam 12 čałaviek. Aproč taho, my vam dašlem śpis patrebnaha abstalavańnia. Kali ŭ vas usio heta budzie, to vydatki skarociacca», — skazaŭ mieniedžar Leščanki.
Za čatyry pieśni ŭ Mahilovie jamu zapłociać $29 tysiač.
Što datyčyć treciaha, Alaksieja Varabjova, to arhanizatar kancertu zapytaŭ za jaho vystup kala $17 tysiač. Prykładna stolki ž i płanujecca vydatkavać na vystup rasijanina ź biudžeta Mahilova.
